“Okondo aurrera” taldea utzi du Amaia Sadaba zinegotziak

Okondo aurrera utzi du Amaia Sadaba zinegotziak. Iragan ostegunean eginiko Udal Osoko Bilkuran eman zuen bere erabakiaren berri. Sadabak azaldu erabaki hori hartu duela ez duelako bat egiten udal-taldeak gauzak egiteko izan duen moduarekin.

Zinegotziak azaldu du “oso momentu gogor eta desatseginak” bizi izan dituela udal-taldean. “Saiatu naiz taldeko kideekin eta udaletik kanpoko jendearekin arazo horiek konpontzen, baina ezinezkoa izan da”. Uneoro baztertu dutela salatu du zinegotziak. “Barne bilera guztietan baztertu naute, eta hori da min gehien eman didana. Kirol zinegotzia nintzen, baina kirol ekintza askoren berri kartelak ikustean edo Okondo.info-n argitaratzean jasotzen nuen”.

Hortaz gain, Sadabak azaldu du berak beti estutu behar izan dituela bere alorreko aurrekontuak, taldeko gainontzeko zinegotziek aurrekontuetan ez zeuden ekimen batzuk babestu dituzten bitartean.  Era berean, jaso dituen “etengabeko kritikak” era aipatu ditu zinegotziak. “Zer egin agintzen zidaten, norekin ezin nuen ezta telefono bidez ere hitz egin, eta zenbait lankiderekin nuen adiskidetasuna ere kritikatu izan dute”.

Zinegotzi bezala jarraituko du
Hala ere, Sadabak adierazi du udalean jarraituko duela, “zinegotzi ez-adskribatu” gisa. “Nire helburua ez da etxera joatea, nire funtzio publikoa babestea baizik”, adierazi du, eta ziurtatu du okondoar guztien interesak defendatzen jarraituko duela. Era berean, barkamena eskatu nahi izan die bere jarreragatik irainduak sentitu ahal izan diren zinegotzi eta udal-langileei. “Lan giro txarrek elkarbizitza negatiboa izatea dakarte”.

Lege-agintaldi hau ez da Sadaba zinegotzi gisa aritu den lehena. 1999-2003 urteen artean ere bete zuen funtzio hori. Eusko Alkartasunarekin.