Mendia eta natura ardatz, seigarrenez antolatu ditu jardunaldiak Okondoko Ganekogorta Mendi taldeak. Abenduaren 15ean hasiko dira, eta urte amaierako txangoarekin emango diote bukaera egitasmoari.
Hilaren 15ean, lehendabiziko egunean, bi hitzaldi eskainiko dituzte. Batetik, Maroño inguruak aztertuko ditu Enrique Arberas Mendibil biologo eta natur ikerlariak. Hain zuzen, berriki kaleratu du Maroño, un pueblo y un embalse liburua. Mendizalea izaki, liburua eta hainbat bideo izango ditu solasaldiaren helduleku. 18:30ean izango da aurreneko zita. 20:00etan, aldiz, Iñaki Garcia Uribe Euskal Herriko mendizaletasun ikerlaria arituko da solasean, Los buzones y los centenarios en el montañismo vasco konferentzian. Ostean egingo dute luntxa eta Okondoko mendi martxako argazki lehiaketako sari banaketa.
Antolatzaileen esanetan, horrez gain, 2 sari zozketatuko dituzte bertaratzen diren gazteenen artean.
Abenduaren 31n , Ganekogortara
Ohiturari jarraituz, Ganekogortan elkartuko dira Okondoko mendizaleak Gabonzahar egunez. 9:30ean jarri dute hitzordua Landetan. Hala, 11:30ean heltzea espero dute gailurrera. Bertan egingo dituzte hamaiketakoa, talde argazkia eta brindisa. Behin indarberrituta, herrira abiatuko dira, 14:00etan iristeko asmorekin.