aiaraldea.eus

80 trikitilari eta 200 animali igandean Okondo girotzeko prest

Erabiltzailearen aurpegia Txabi Alvarado Bañares   Kultura  Okondo

Udalak jakinarazi du aurreikuspen guztiak gainditu direla eta karpa erraldoia jarriko duela. 200 lagunentzako bazkaria egongo da egunari amaiera emateko.

80 trikitilari eta 200 animali igandean Okondo girotzeko prest
Iaz ere Okondon egin zuten Arabako Trikiti Txapelketa. / Aiaraldea.eus | Ikusi handiago | Argazki originala

Datorren igande goizean -urriak 21- Okondon giro ederra egongo dela aurreikusi daiteke. Bi ekintza egongo dira herrian egun horretan: Udazkeneko Azoka eta Arabako Trikiti Txapelketa.

Euskal oilo eta untxien lehiaketa egongo da azokan, eta 200 animalik hartuko dute parte norgehiagoka horretan.

Frontoian egongo dira abereak, eta hainbat epaimahai egongo dira puntuatzen. “Euskal antzarak ikusteko aukera ere egongo da”, jakinarazi du udalak, “dastatzeak ere egongo dira: gaztaina erreak, txitxikia eta oilasko hanburgesa txikiak”.

Arabako Trikiti Txapelketan, aldiz, zazpi bikotek eman dute izena, sei gipuzkoarrek eta bizkaitar batek. Hiru pieza jo beharko dituzte epaimahaiaren aurrean: fandangoa, arin-arina eta popurria.

Aurreikuspenak gaindituta
Trikiti topaketan, aldiz, handiagoa izango da parte hartzea, 80 trikitilarik eman baitute izena. “Antolatzaileen kalkulu guztiak gainditu dira eta udalak karpa erraldoia jarri beharko du”, azaldu du tokiko erakundeak, “parte-hartzaileek kalejira erraldoia egingo dute herrian eta azokaren esparruan”.

Hainbat tokiko musikariak egongo dira topaketan: Amurriokoak, Arespalditzakoak, Laudiokoak, Aretakoak, Urduñakoak, Sopelakoak, Mungiakoak, Bilbokoak, Gernikakoak, Eibarrekoak, Debakoak, Altzokoak, Orendainekoak, Arrasatekoak, Legazkikoak, Lizarrakoak...

Nabarmendu dutenez, txapelketa euskaraz izango da eta eskura jarriko dute Euskaraldiaren gaineko informazioa eta materiala.  

Azokaren eta txapelketen ostean herri bazkaria eta trikiti jaia egongo dira. 200 pertsonentzako otordua prestatuko du Laudioko Rakatapla elkarteak.

Iaz ere Okondon egin zuten Arabako Trikiti Txapelketa:

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa