Okondo Aurrerak salaketa jarri du Laudioko Ertzain Etxean "Okondo valiente" Facebook profilaren aurka. Talde independentearen ustez, erabiltzaileak anonimotasuna baliatu du bere ordezkariak iraintzeko behin eta berriro.
Taldeak azaldu du martxoaren 18an albiste asmatua argitaratu zuela profilaren arduradunak, eta aukera hori profitatu zuela irainak, gezurrak eta eraso matxistak adierazteko, bereziki, Itziar Kastrexana zinegotziaren kontra.
Okondo Aurreraren aburuz, jarrera horrekin jarraitu du sare sozialetan herritar horrek hurrengo egunetako argitarapenetan. Horren ondorioz, poliziak esku hartzea sustatu du taldeak, berdintasunaren eta elkarbizitzaren kontrako jarrera antidemokratikotzat jo baitu egindakoa.
Horrez gain, alderdi independenteak "barkamen publikoa" eskatu dio Naiara Otaola EH Bilduko alkategaiari. Izan ere, Okondo Aurreraren iritziz, koalizioko hautagaiak profil horren adierazpenak babestu ditu. EH Bilduk, ordea, adierazi du akusazio horiek faltsuak direla: "Okondo Aurrera bere kudeaketari buruzko eztabaida desbideratzen saiatzen ari da".