aiaraldea.eus

EAJ eta EH Bilduren artean banatu dituzte Okondoko udal arloak

Erabiltzailearen aurpegia Izar Mendiguren Cosgaya   Politika  Okondo

Jon Escuza alkateak jardun erdiz egingo du lan, 23.400 euroren truke. Akordioaren ondorioz, EH Bilduk 4 arlo eramango ditu, eta EAJk gainontzekoak. Okondo Aurrerarentzat esperotako emaitza izan da, eta koalizio abertzalearentzat zein jeltzaleentzat "etapa berri baten hasiera".

EAJ eta EH Bilduren artean banatu dituzte Okondoko udal arloak
Okondoko Udalaren antolaketa aurkeztu dute. / Aiaraldea.eus | Ikusi handiago | Argazki originala

Udalbatzan onartu zuten Okondoko udal osaera berria. Jon Escuza alkatea jardun erdiz arituko da gobernu buru lanetan, eta 23.400€ jasoko ditu horren truke.

Arloei dagokienean, EH Bildu eta EAJren artean banatu dituzte. Jeltzaleek kudeatuko dituzte kultura eta hezkuntza, Eneritz Alonso buru izanda. Horrez gain, alkateorde izango da Alonso. Pablo Alcalderen esku geratuko dira, aldiz, ongizate, ingurumen, kirol eta jai arloak.

Marisa Urruelak ogasun eta garapen ekonomikoa gidatuko du, eta Jon Escuza alkateak hirigintza, obrak eta zerbitzuak. Hala, Naiara Otaola EH Bilduko zinegotziaren esku geratuko dira euskara eta berdintasun sailak, eta Joseba Ruiz koalizioko kideak hartu du bere gain mendien eta abeltzaintzaren ardura. 

Talde politikoek 100€ jasoko dituzte, eta zinegotziek 30€. Horrez gain, udalbatza bakoitzagatik zinegotziek 60€ lortuko dituzte, eta batzordeetara bertaratzeagatik 40€. 

Alderdien erreakzioak
Okondo Aurrera taldearen ustez, esperotako emaitza izan da. Sergio Tatoren aburuz, azpiko akordioa izan da: "Ez gaitu harritu. Emaitzak ateratzean hasi ziren ospatzen. Antolaketa Batzordean EH Bildu ados agertu zen EAJk aurkeztutakoarekin. Hori da Okondoko errealitatea: alde batetik alderdiak daude, eta bestetik auzokideen plataforma. Orain, eurei egokitu zaie".

Naiara Otaola EH Bilduko ordezkariak akordioa aurreko lege agintaldiko talkak eta hausturak bideratzera dator: "EAJk eta EH Bilduk beharra ikusi dugu gure ezberdintasun politikoak alboratzea akordio garrantzitsuak lortzeko, udal kudeaketan lasaitasuna, parte hartzea eta ongizatea ekarriko dituen etapa berria hasteko". 

Jon Escuza jeltzaleak garrantzitsutzat jo du adostasuna: "Urteak daramatzagu konfrontazio egoeran eta gezur artean. Pozik gaude emaitzarekin. Ona da Okondo hazteko jarrera positiboa eta baketsua izatea. Uste dugu positiboa dela Okondoren alde lan egiteko EH Bildurekin akordioa erdietsi izana".

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa