Haizea Otaola okondoarrak Argentinan igaro ditu sei hilabete unibertsitateko beka batekin. "CECARAn Global Training bekarekin egon naiz, Argentinako Hegazti Harrapakarien Ikerketa eta Kontserbazio Zentroan lan egiteko izan da".
Santa Rosan (La Pampa, Argentina) igaro du urte erdia, hainbat proiektutan parte hartzen: "galzorian dagoen hegazti baten GPS bidezko jarraipenean, hegazti paseriformei eraztunak jartzen, foto-tranpeoko argazki kamaren bidez haragijaleen jarraipena egiten eta hegazti zein haragijaleen gorotzak aztertzen euren dietaren analisia egiteko, besteak beste".
Beka garaia agortuta, Hego Amerika ezagutzeko denbora hartzea erabaki du: "Orain, Bolivian gaude, La Pazen, baina ez da bisitatu dugun herrialde bakarra izan. Bi aste baino gehiago daramatzagu bidaiatzen. Lehenengo 8 egunetan Argentinako ipar-mendebaldean dauden Salta eta Jujuy bisitatu genituen, han Cafayate, Cachi, Tilcara eta 7 eta 14 koloreko mendiak bisitatu genituen. Ondoren, Chilera joan ginen eta 3 egunez Atacamako desertuan egon ginen. Bertatik Boliviara joan ginen ibilaldi batekin, eta 3 egunetan zehar Uyuniko basamortua, lakuak, gatz-lautadak eta abar ikusi genituen".
Zerk harritu duen gehien galdetuta, jendeak orainaldia bizitzeko moduak harritu duela dio: "Adibidez, Argentinan inflazioagatik aurrezkiak izateak etorkizuneko edozein erosketetarako ez du zentzurik".
Udan eta neguan turismo asko dagoela azpimarratu du: "Tokiaren arabera urtaroak oso desberdinak dira. Argentinako ipar ekialdean neguan ez dira oso tenpera baxuak izaten. Hegoaldean, aldiz, oso baxuak dira, eta ondorioz turismorako lan egiten duten pertsonek ere hilabete horietan ospa egiten dute".
Egonaldia pittin bat gehiago luzatzeko asmoa du Otaolak Argentinan, bidaiatzen jarraitzeko, besteak beste: "Momentuz irailaren hasieran Argentinan ospatuko den hegaztiei buruzko kongresu batera joango naiz".