Eusko Jaurlaritzako diru-laguntza deialdira aurkezteko ez-ohiko udalbatza egin zuten atzo Okondoko Udalean. Jon Escuza alkatean azaldu zuenez, diru-laguntza eskaera epea gainean dutelako aurreratu zuten deialdia -osoko bilkura hileko azken ostegunean da-, eskaera telematikoki egiteko denbora edukitzeko. Okondo Aurrerak deialdiaren urjentzia kritikatu zuen. “Kontsultatu eta informazioa pasa gabe deitu duzue bilkura”, aipatu zuen Sergio Tato zinegotziak. Hori dela eta, deialdiaren onespen bozketan kontrako botoa eman zuen plataformak. Gainontzekoen –EAJ eta EH Bildu- aldeko bozarekin egin zuen aurrera deialdiak.
“Aukera ona da saneamendu sarea bereizteko. Proiektu teknikoa egina dago, Arabako Foru Aldundiaren eskuetan dago”, adierazi zuen alkateak. Landa eremuetako herrien garapenerako laguntzetan kokatu nahi dute proiektua eta, Arabako Foru Aldundiaren babesa ez ezik, Eusko Jaurlaritzarena ere lortu nahi du udalak. “1.400.000 eurokoa da aurrekontua, 53.000€ balio dute obrek”. Guztira, beraz, 1.453.000€ bideratuko ditu tokiko erakundeak lanetara. Gastuari aurre egiteko Arabako Foru Planetik 927.630€ aurreikusi dituzte, eta baliabide propioetatik –hau da, udaletik- 527.856€. “Horrenbestez, guztira 1.455.000€ ingurukoa da zenbatekoa”, erantsi zuen Escuzak.
Tokiko instituzioaren gastua murriztu nahi dute Eusko Jaurlaritzako deialdiaren bidez. “Herri osoan eragingo dute lanek, errepide nagusia alde batetik bestera zabaldu beharko da, espaloi bakoitzean ur fekalak eta gainontzekoak bereizteko. Herritarrek ez dute onura nabarituko, baina ingurumenak bai”, aurreratu dio alkateak Aiaraldea hedabideari. Obrek urtebeteko iraupena izatea espero dute, lurra altxatu beharko baita eta horrek trafikoari eragingo baitio. Europako arautegiak ur saneamendua sailkatua izan behar dela dioelako sustatu dute lana.
Okondo Aurreraren kexa
Eragile politiko guztiek egin zuten bat proposamenarekin. Okondo Aurrerak hitzartzea baliatu zuen bere jarrera argudiatzeko: “Egitasmoaren alde bozkatuko dugu, aurreko lege-agintaldian Okondo Aurrerak proposatutako proiektua izan baitzen”. Alabaina, ez-ohiko deialdiarekiko desadostasuna berretsi zuen: “Oposizioarekiko errespetu falta da, eta hori da lege-agintaldi honetan EAJ hartzen ari den bidea”. Ohiko bilkura irailaren 26an izango da, 19:00etan udaletxean.