Gontzal Mendibilek abenduaren 13an kantatuko du Okondon, Ganekogorta Mendi Taldeak antolatutako Mendiari eta Naturari buruzko VIII. Jardunaldietan. Iñaki Garcia Uribe egongo da Mendibilekin batera, abestiekin batera Gorbeiari buruzko kondairak kontatzen.
Jardunaldiek, urtero bezala, bi eguneko iraupena izango dute. Abenduaren 12an eta 13an egingo dira. Lehenengo egunean, ostegun arratsaldean, Enrique Arberas biologoak Trampeando en Canadá hitzaldia eskainiko du, Ipar Amerikako estatu horretan tranpa-jartzaile batekin batera izandako bizipenak azaltzeko. “Tranpen bidezko ehiza, hango natura alderdiak, espezieak, flora eta paisaia kontatuko ditu”, aurreratu du Justino Arto antolatzaileak.
Ostiral arratsaldean, Mendibilen eta Garciaren emanaldiaz gain, Aitor Aspuru dantzari eta panderojole amurrioarraren eta “Floren y sus muchachos” taldearen saioak ere egongo dira. Jatekoak eta brindisa eskainiko dira musika amaitzean.
Gainera, larunbat edo igande horretan bertan, Mendizale Eguna ospatuko dute Laudioko Goikogane taldearekin batera. Printzipioz, “egun osoko irteera” egingo dute Nafarroa inguruan, non, ibilaldi baten ostean, talde bazkaria egingo duten. Gabon Zahar egunean, aldiz, Ganekogortarainoko igoera egingo dute goizean.