Okondoko San Sebastian jaiak ospatuko dira datorren urtarrilaren 25ean, larunbata, goiz eta eguerdian zehar. Arratsaldean, aldiz, herriko kaleetan zehar mantenduko da giroa. Jardunaldia Otaolako ermitara igota hasiko da, meza eskaainiko baita bertan eguerdian.
Meza amaitu eta segidan, bazkaltzeko ordua helduko da. Antolatzaileetako batek adierazi duenez, hainbat “su txiki” egingo dira, non pertsona bakoitzak bere bazkaria prestatuko duen. Normalean, partaideek “odolostea, txorizoa, babarrunak, basurdea” eta antzeko plater nagusiak prestatu ohi dituzte. Bazkariari amaiera emateko, nola ez, postre dastaketa egiten da ere, “erroskoak edo pastelak”.
Otordua eta gero, “nahikotxo” edateko momentua izango da. “Kepak egindako patxarana” da, baliteke, edari arrakastatsuena. Edan beharrekoak edanda, jaitsiera hasita, zuhaitz mozketa egingo da. Hau da, eukalipto bat, “espezie inbasorea”, moztu eta herri osoan zehar paseatuko da.
Dena den, herrira heldu baino lehen, geldialdi batzuk daude programatuta. Horietako bat “Joseluren etxean” izango da, berak egindako zapakina dastatzeko. Emakumeen eta gizonen arteko arraun lehiaketa egingo da ere bertan.
Behin herrian, parrandazaleak tabernaz-taberna joango dira zuhaitzarekin eta trikitixaren erritmoa jarraiki, amaierara heldu arte. Han, arbola hainbat zatitan moztuko da, eta partaideek nahi beste zati eraman ahalko dituzte euren etxeetara.