Estatu Espainiarreko ginik onena izendatua izan eta gero, Astobiza upategiko produktuak edari horren munduko txapelketako finalean parte hartuko du, London Dry Gin kategorian, hain zuzen ere.
Otsailaren 27an izango da finala eta Astobizako ekoizleek egun horretan jakingo dute nor den irabazlea. Berez, gin finala ez ezik, bestelako edarien txapeldunak jakinaraziko dituzte ere "World Drinks Awards" lehiaketan: tekila, rona, whiskya...
Dena den, Jon Zubeldia Astobizako gerentea oso pozik jadanik Estatu Espainiarreko ginik onena hautatu dutelako: "mezu hori gaineratu nahi dugu, onenak garela esparru horretan, alegia".
Ginebra elkarlanean
Urtebete eta hilabete batzuk ditu Astobizako ginak eta Basque Moonshiners destilategiarekin gauzatu dute egitasmoa.
Jon Zubeldiaren ustez, euren sekretua da tokiko hainbat osagai erabiltzen dutela: "Kilometro 0-ko filosofia dugu gogoko. Osagai botanikoak gureak dira. Ipurua, ordea, Aiaraldeko ekoizleek eman digute. Azkenik, zitrikoak Euskal Herriko iparraldean eskuratu ditugu. Fresarabako marrubiak ere erabili ditugu".
Ardo beganoa
Gina ez da izan azken urteotan Astobizak prestatu duen proiektu berritzaile bakarra. Izan ere, bere ardoak erabat beganoak dira.
Jon Zubeldiak horren berri eman du: "Printzipioz, mahatsa da ardoaren osagai nagusia, baina arrautzaren zuringoa ere baliatzen da ekoizpenean. Gaur egun, ordea, aukera dago patata ilar proteina erabiltzeko, beganoa izan dadin. Guk, berez, ardo guztiz beganoa egiten dugu, baina ez dugu aipatzen, ez baitago erakunde ofizialik hori bermatzen duenik".