Xabier Ramos argazkilari okondoarrak sei argazkiko erakusketa jarri du bere herriko Txaparro tabernan: “Gutxi dira, baina, nire ustez, kalitate onekoak dira”. Argazki horietan, Aiaraldeko inguru naturalak eta animaliak erretratatzen ditu. Hori da, hain zuzen, gehien gustuko duen argazkigintza mota.
Erakusketaren ideia tabernako jabeari egindako proposamen bat bezala hasi zen. Baina, arrakasta izatekotan, Kultur Etxean “zerbait handiagoa” jartzeko asmoa du ere Ramosek, “jaietarako edo”.
Nahiz eta bere bizitzan zehar “mota askotako argazkigintza” egin izan duen, “publizitate, modelo eta ezkontza argazkiak barne”, natura du gogokoen. Hala ere, naturaren inguruan ari denean, bere lanetan “paisaiak baserriekin” ez dituela nahastu nahi zehazten du, “animaliak eta paisaiak” ateratzen ditu soilik.
Normalean, “hogei kilometroren bueltan” ateratzen ditu bere argazki gehienak Ramosek. “Argazkiak gustuko dituzten pertsonak Islandia edo Maroko bezalako tokietara doaz, baina niri interes gehien sortzen didatenak Aiaraldeko, Arabako eta Bizkaiko paisaiak dira”, argudiatzen du okondoarrak. Bere aburuz, inguruko tokiak “oso ikusgarriak” dira. Dena den, bidaiatzea ere gustuko duela argitu du.
Bere lana jendearekin konpartitzea gustatzen zaiola gehitu du argazkilaria, "pertsona guztiei bezala". Sare sozialetara igo ohi ditu irudiak. Hainbat irudi salgai jarri ditu, Facebooken.