aiaraldea.eus

Kirola bultzatzeko akordioa sinatu nahi du Udalak

Erabiltzailearen aurpegia Julen Solaun Martinez   Politika  Okondo

Futbol zelaia handitzea ere aurreikusten du tokiko erakundeak. Era berean, herritarrekin maiztasunez bilduko direla ere adierazi dute, haien “kezkak eta beharrak” jakiteko eta “udal gisa erantzun ahal izateko”.

Kirola bultzatzeko akordioa sinatu nahi du Udalak
Azken sei hilabeteetan zehar hartutako neurri batzuk gogoratu dituzte EAJko udal gobernutik. / Aiaraldea.eus | Ikusi handiago | Argazki originala

Okondoko udalak, “kirol jarduerari dagokionez, bizilagunen bizi-kalitatea hobetzeko” akordioa sinatzea espero du datorren asteetan.

Esaterako, futbol zelaia “handitzeko eta berreskuratzeko” lanean ari direla jakinarazi du EAJren udal gobernuak.

Bestalde, Osakidetzarekin batera ari dira lanean martxotik aurrera herriko adinekoei eskainiko zaizkien ikastaroak adosteko.

Era berean, “lan egiteko moduari 180 graduko bira emateko”, auzokideekin “kezkak eta beharrak” ezagutzeko bilerak egitea ere aurreikusi dute, “udal gisa erantzun ahal izateko”.

Zailtasunak gaindituta

Azken hilabeteetan burutu den kaleen aldaketa egiteko, aldiz, zailtasunak izan dituztela aitortu dute jeltzaleek, nahiz eta dagoeneko “azken fasean” daudela adierazi, eta herriko bizileku eta establezimenduetan plakak jartzen adi direla azaldu dute.

Udal gobernura heldu zirenetik egindako hainbat neurri eta aldaketa ere azpimarratu nahi izan dituzte oharrean. Esaterako, udal langile bat jarri dute eskolan familia eta eguneroko bizitza bateratzen laguntzeko. Haurrak ikastetxetik autobus geltokiraino laguntzen ditu pertsona horrek.

Gainera, belar-sastrakak kentzeko eta basoa berritzeko zerbitzua azpikontratatu dute, arazo logistikoak argudiatuta: “Lanaren dimentsioengatik ezinezkoa zen baliabide propioekin garatzea”.

Erantzun

Erantzuteko, izena emanda egon behar duzu. Sartu komunitatera!

»» Alta eman edo pasahitza berreskuratu


Twitter ikonoa Facebook ikonoa