Asteazkenean hil zen Roberto Martinez musika ekoizlea, minbizi baten ondorioz, 52 urte zituela. Dubby Ambassah izen artistikoarekin ezagutzen zuten reggae komunitatean eta, jaiotzez Sopelakoa izan arren, Okondoko baserri batean bizi izan zen urte luzez, bere senide batzuekin batera.
Okondok pisu nabarmena izan zuen Ambassahren bizitzan. Horren seinale da herriaren izena jarri izana Pirates Choice Recordings zigiluaren barruan sortutako azpizigiluari. Antza, Afrikan Okondo izeneko tribu bat dago. Zigiluan afrikar baten marrazkia agertzen da, Okondo herriaren eta Okondo tribuaren arteko lotura eginez.
Aintzidaria reggae giroan
Ibilbide oparoa egin zuen okondoar-sopelarrak reggaearen munduan, musikari, aditu zein bildumazale moduan.
Aitzindaria izan zen musika estilo horren zabalkundean. 90. hamarkadan The Ambassador taldea sortu zuen (hortik datorkio bere izen artistikoa). Orduz geroztik beste hainbat talde eta proiektutan hartu zuen parte, Euskal Herrian, Kantabrian zein Londresen: Vibes All-Stars, Dub Generation, Lone Ark Riddim Force, Basque Dub Foundation, Loud & Lone, The Producers edota Message.
Bakarkako lanak ere argitaratu zituen, “Rub A Dub Showcase I”, “Rub A Dub Showcase II”, besteak beste.
Ekoizle gisa, nazioartean arrakasta
Mende berriarekin batera musika ekoizle funtzioa hartu zuen gehienbat. Orduan sortu zituen arestian aipatutako Pirates Choice Recordings zigilua eta Okondo azpizigilua (Crucial Ruler izeneko beste bat ere gorpuztu zuen, ekoizpen digitalera bideratua zegoena gehienbat).
Artista britainiar zein jamaikar ugariren lanak ekoiztu zituen orduan: Sugar Minnot, Linval Thompson, Kenny Knotts, Horace Martin edota Clive Mathews.
Dubby Ambassah berak elkarrizketa batean azaldu zuenez, ekoizpen horiek arrakasta nabarmena lortu zuten nazioartean, hainbat zerrendetako goiko postuak erdiesteraino.
Perkusionista moduan ere aritu zen, Santanderreko Roberto Sanchez ekoizlearen bidelagun moduan. Reggae eszenako hainbat izen esanguratsurekin batera aritu zen zuzeneko zein estudioko sesioetan: Earl Sixteen, Viceroys, Earl Zero, Rod Taylor, Noel Ellis edota Willie Williams.
DJ moduan ere lortu zuen arrakasta, Bomb Bass Hi Fi sound systemarekin, Bilboko Fever klubean, eta abeslari zein irrati esatari moduan ere aritu izan zen une batzuetan.