Okondo Aurrera talde independentea oso modu kritikoan mintzatu da Udal Gobernu Taldeari buruz hedabideei bidalitako prentsa oharrean. Alderdiak salatu du tokiko erakundeak biztanle bakoitzeko 2,53 euroko diru-laguntzak bideratu dituela COVID-19ko krisialdiari aurre egiteko. Guztira, 3000 euro.
Taldeak salatu du hasieran EAJk eta EH Bilduk ez zutela asmorik diru-laguntzarik eskaintzeko eta oposizioaren ideia izan zela. Bestalde, independenteek nabarmendu dute inguruko udalerrietan inbertitutako kopurua handiagoa izan dela: 40.000 Aiaran edota 25.000 Orozkon.
Horrez gain, Okondo Aurreraren aburuz, asko mugatu da diru-laguntzen balizko hartzaile profila eta kanpoan geratu dira autonomo ugari edota enpresa txikiak eta langabeak.
Taldearen iritziz, aintzat hartuta zenbait zerbitzu ez direla emango: igerilekuak, udalekuak, jaiak, azokak... Okondoko Udalean diru gehiago bideratu beharko litzatekeela diru-laguntzetara. Horregatik, egotzi die EAJ eta EH Bilduri udalerriko sozioekonomia suntsitzea.
EH Bilduren erantzuna
Edonola ere, EH Bilduk ez du bertsio bera azaldu. Koalizioak adierazi du aurrekontuak onartu zirela COVID-19aren ondorioz agertzen ari ziren gastuei aurre egiteko. Halaber, bere ordezkariek gaineratu dute diru-laguntzen kopuruak aldatu daitezkeela beharren arabera eta orain arteko urratsak herriko negozioekin hitz eginda eman direla.
Zinegotzien hitzetan EH Bilduk, berez, ez dio atea itxi diru gehiago inbertitzeari esparru horretan eta horrela adierazi dute udalbatza guztietan.