Ostiral goizaldean Okondoko Batzokian jazotako sutea kolpe latza izan da Egia familiarentzat. Hiru ahizpen artean kudeatzen dute taberna, eta hori da euren diru-iturri bakarra. “5:20ak aldera deitu ninduten segurtasun enpresako arduradunek, tabernan alarma piztu zela eta Ertzaintza deituko zutela esanez”, azaldu du Isabel Egiak, “nire ahizpa eraikin berean bizi da, amarekin, eta leihoa zabalik zuenez segituan nabaritu zuen ke usaina”.
Ez dute oso argi non sortu zen sutea, sukaldean edo gaineko biltegian, baina kaltea handia izan zen, biltegia beteta zegoelako. “Plastikozko ontziak eta kartoiak zeuden, eta baita ardo zein likore ugari ere”. Material guzti horrek erregai funtzioa bete zuen, eta “erabat kiskali” zen gunea, Egiak nabarmendu duenez.
Suhiltzaileak “berehala” iritsi zirela gaineratu du tabernako kudeatzaileak, itxaronaldia “amaigabea” izan arren: “Kamioi eta auto ugari bertaratu ziren, eta denbora tarte bat behar izan zuten sua guztiz itzaltzeko”.
Buruari buelta ugari
Ostiral goizetik aurrera Batzokian eman dute Egiatarrek denbora gehiena. Zaila zaie suteak eragindako kalteen benetako dimentsioa kalkulatzea. “Biltegia nahiko beteta zegoen, baina den-dena kiskali da. Kristalak baino ez daude lurrean. Gauzak hala, ez dakigu zehazki zenbateko galera izan dugun”.
Gauzak hala, ez dakite Batzokia noiz ireki ahalko duten berriz, ezta berriz irekitzerik izango duten ere. “Aseguruarekin hitz egin behar dugu lehenbizi, zenbat ordainduko diguten jakiteko. Ondoren, aditu bati deitu beharko diogu, kalteak kalkulatu eta dena berriz martxan jartzeko aurrekontu bat osatzeko. Ez dugu beste munduko ezer eskatzen, baina gutxieneko inbertsio bat egin beharko dugu”.
Koronabirusaren krisiak ere izango du eragina tabernaren etorkizunean. “Hau COVID-19aren krisia baino lehen gertatu izan balitz dudarik gabe irekiko genuke berriz, baina orain ez dugu horren argi, une batetik bestera berriz konfinamenduan sartu ahalko ginatekeelako eta tabernetara jotzen duen jende kopurua murriztu delako”.
Bizilagunen elkartasuna
Egia ahizpek eskerrak eman nahi izan dizkiete egun hauetan babesa helarazi dieten bizilagun guztiei. “Batzuk mezuak bidali dizkigute, behar dugun horretan laguntzeko prest daudela esanez. Beste batzuk, aldiz, tabernara gerturatu dira animoak ematera. Kafeak, pastak eta janaria ere eman dizkigute”. Udalaren partetik jasotako tratua ere eskertu dute: “Hemen egon dira gurekin”.