Duela aste batzuk ekin zion Okondoko Udalak Edateko Uraren Tratamendurako Estazioa konpondu eta eguneratzeari. Enpresa berri bat kontratatu dute lanak egiteko, eta kontrol-balbula berria jartzea ahalbidetuko du horrek, estazioak egin beharreko lanak automatizatzeko.
“Bi turbidimetro jarri dira, lau neurketekin”, zehaztu du tokiko erakundeak. Tresna horien bidez uretako uhertasuna modu zehatzean neurtu ahal izango da. Ugalde eta Asunsako iturburuetatik datorren ura kontrolatzeko ere balioko dute gailu berri horiek.
Jon Escuzak azaldu du hilabeteak daramatzatela lanean “aspalditik dagoen arazo honi irtenbidea emateko”. Alkateak zehaztu duenez, iragazkiak ere aldatu behar izan dituzte, “denboraren poderioz” kaltetuta zeudelako. "Bypass-ak ere ihes ugari zituen, eta elementu hori oso garrantzitsua da".
Gainera, sistema pneumatikoan zeuden hodiak ere hautsita zeuden eta ezin ziren automatikoki erabili. “Eskuz soilik maneiatu zitezkeen orain arte”.
Uraren azterketa
Escuzak jakinarazi du astelehenean uraren uhertasuna aztertu zutela udalerriko hainbat puntutan. “Uraren kalitatea Osasun Sailak eskatzen dituen parametroen barruan dagoela diote neurketa horien emaitzek”.
Alkateak nabarmendu du obrak datozen egunetan amaituko direla. 40.000 euroko aurrekontua baliatzen ari dira proiektua gauzatzeko.