Down sindromea duten kirolarien eskaera eraman zuen astelehenean Almudena Otaola okondoarrak Madrileko Senatuko oholtzara. Senatari jeltzaleak down sindromea duten kirolarientzako kategoria bat sortzea eskatu zuen, kolektibo horrek pairatzen duen “diskriminazioarekin” bukatzeko.
Nazioarteko Batzorde Paralinpikoak sistema berri bat ezartzea eskatu zuen EAJko senatariak, “praktikan kirolari horiek txapelketatik kanpo gera ez daitezen”. Gaur gaurkoz kategoria generiko baten barruan daude sartuta down sindromea duten kirolariak, gaitasun intelektual askotako kirolariekin; eta horrek ia ezinezko egiten du zenbait marka lortzea.
Paralinpiadetan ez parte hartzeak down sindromea duten kirolariak goi-mailako kirolaritzat ez hartzea dakar. Aitortza horren faltak bekarik jaso ezin izatea edota pandemiaren moduko egoeratan entrenatu ezin izatea dakarkie, Otaolak nabarmendu duenez.
Mikel Garcia Agirrezabal kirolari bilbotarraren eskaera eraman zuen okondoarrak senatura. Munduko txapelduna izan da Garcia 400, 800 eta 1.500 metroko proba atletikoetan eta denbora luze daramate berak eta bere ingurukoek goi-mailako kirolari izendatua izateko aitortzaren alde borrokan. Besteak beste, sinadura bilketa bat abiatu zuten Internet bidez eta dagoeneko 8.000 baino gehiago lortu dituzte.