Okondoko bi tabernen lizitazioa ireki du udalak uda sasoirako. Igerilekuetako taberna eta futbol zelaian kokatutakoa dira udalak taberna ustiapenerako lagapenean utziko dituen bi establezimenduak.
Igerilekuetako taberna bertako erabiltzaileentzako bideratua egongo da bakarrik. Kontratistak 600 euro ordaindu beharko dizkio gutxienez udalari, eta igerilekuko ordutegia errespetatu beharko du, hots, 11:30etatik 22:00etara. Igerilekuen egutegiaren baitako iraupena izango du kontratuak, eta bigarren urte batez luzatzeko aukera egongo da.
Futbol zelaiko taberna publiko orokorrari zabalik egongo da. Kasu honetan lokalaren kudeaketa bere gain hartzen duenak 1.200 euro ordaindu beharko dizkio udalari gutxienez. Irekiera ordua 11:00ak baino lehenago izan beharko da egunero eta itxiera orduak ezingo du legeak ezarritako ordutegia gainditu Tabernaren ustiapena irailaren 30era arte luzatuko da eta bigarren urte batez luzatu ahalko da kontratua ere.
COVID-19aren aurkako neurriak
Bi tabernek COVID-19ari aurre egiteko segurtasun neurri eta protokoloak bete beharko dituzte, eta instalazioen garbiketaz arduratu beharko dira ere.