Okondoko udal igerilekuetan aldaketa nabaria egongo da udako sasoian. Izan ere, emakumezkoen iritzia jasota, udalak erabaki du han dagoen tabernaren terrazaren kokapena aldatzea. Etorkizunean ez da egongo aurrean, baizik eta tabernaren atzean.
Berez, emakume asko deseroso sentitzen ziren, derrigorrezkoa baitzen terrazaren aurretik igarotzea bainua hartzeko. Miren Urresti berdintasun teknikariak aipatu du bilera batean atera zela gaia eta ezustean harrapatu zuela entzuteak hainbeste emakume ados egotea puntu horretan: "Emakumezko batzuk uko egin zioten igerilekuetara joateari, terrazaren aurretik ez igarotzearren, bortitza baitzen eta erabiltzaile batzuek ez zizkietelako begiak gainetik kentzen".
Gauzak horrela, udalak tokia aztertu eta tabernaren atzeko partean kokatu du terraza. Berdintasun zinegotziak Naiara Otaolak eta Miren Urrestik adostu zuten toki berria. "Mendia ikusten da eta pasaia oso polita da. Eta garrantzitsuena, emakumeak joan ahalko dira igerilekuetara bainatzera norbait begira dutela sentitu gabe", adierazi du teknikariak.