Goizeko 4:40an jaso dute deia larrialdi-zerbitzuek: baserri batek su hartu du Okondon, Markuartuko gainean. Laudio eta Langraitzeko suhiltzaileak bertaratu dira sua itzaltzera, eta sugarrak amatatzea lortu duten arren, baserri barruan zeuden hiru bizilagunak hil egin dira. Antza, bi gizonak ezkongabeak ziren, baina emakumeak hiru seme-alaba zituen.
"Guztiok ezagutzen dugu elkar. Nik pertsonalki ezagutzen nituen barruan zeuden pertsonak"
Goiz guztia igaro dute suhiltzaileek egitura eraisten. Izan ere, suak kalte larriak eragin ditu eraikinean. Komunikabide eta ordezkari publiko ugari bertaratu dira Markuartura, tartean, Ramiro Gonzalez Arabako Diputatu Nagusia.
Jon Eskuza Okondoko alkateak azaldu du etxebizitza barruan hildako hiru pertsonak herrian aski ezagunak ziren hiru neba-arrebak zirela: "Udalerri txikia gara, familiartekoa. Guztiok ezagutzen dugu elkar. Nik pertsonalki ezagutzen nituen barruan zeuden pertsonak. Oso triste gaude. Ez da atsegina mota honetako albiste bat eman behar izatea".
Ramiro Gonzalez Arabako Foru Diputatua eta Jon Escuza Okondoko alkatea bertaratu dira, besteak beste, sutea jazotako lekura. Komunikabideen presentzia ere geroz eta handiagoa da. Irabieni auzoko errepideak moztuta jarraitzen du pic.twitter.com/Wxrn2A1Ekq
— Aiaraldea.eus (@aiaraldea) March 24, 2022
Okondon samina sortu du albisteak. "Triste gaude, ezin dut beste hitzik esan. Erabateko babesa helarazi nahi diogu familiari, udalaren zein bizilagunen partez" adierazi du Eskuzak. Udalerrian ekintzarik aurreikusten den galdetuta "zuhurtziaz" jokatzeko deia egin du alkateak: "Gauzak nola jazotzen diren ikusiko dugu orain, eta gero hartuko ditugu erabakiak. Baina ez gara gertatzen ari den horretara aurreratu nahi, familiarekiko errespetuagatik".
Okondoko Udalak babesa adierazi die zendu diren hiru neba-arreben familia eta senideei: Erabateko babesa helarazi nahi diogu familiari, udalaren zein bizilagunen partez. Errespetua eskatu nahi dugu eurentzat, eurak direla hau lehen pertsonan pairatzen ari direnak".