Iragan apirilaren 6an Okondoko Udalak hasiera eman zion herritarren beharrizanak jasotzeko egingo duen auzoetako asanblada birari. Herritarrekin "komunikazio kanal zuzena" sortu nahi du tokiko erakundeak, bizilagunen kezkak jaso eta auzoetako egoera hobetzeko asmoz.
Asanbladak egin aurretik auzo bakoitzeko diagnostikoa osatu du Udalak, bihartik aurrera egingo diren bilkuretan diagnostiko horretatik ateratako informazioaren gainean lan egiteko asmoz. Galdetegia bidali zaie modu aleatorioan hautatutako bizilagunen lagin bati, eta euren erantzunak baliatu dira diagnostikoa osatzeko.
Asanbladak auzoz auzo
Ugalde, Landeta eta San Roman auzuneetako bizilagunak izan ziren prozesuan parte hartzen lehenak, apirilaren 6an egindako bilkuran. Bihar, apirilak 13, Aguirre-Ventilla, Laburu, Izega eta San Prudentzioko bizilagunen txanda izango da; 18:30ean jarri dute hitzordua San Romaneko eskolan.
Ordu eta toki berean, baina apirilaren 20an, Aretxaga, Ziario, Lembarri, Goriostiola eta Zudibiarte auzoetako beharren inguruan eztabaidatuko dute. Azkenik, apirilaren 27an, Irabien eta Olabarrieta auzoetan bizi diren bizilagunek Udalarekin elkartzeko aukera izango dute, Jubilatuen egoitzan egingo den asanbladan.
Erdigunean bizi diren auzokideek ere, maiatzetik aurrera izango dute euren beharrizan eta kezkak Udalari aurkezteko parada, kalez kale egingo diren asanbladetan. Bilera guztiak Kultur Etxean egingo dituzte, 18:30ean.
- Maiatzak 4: Garaikoetxea etorbidea, Malkuartu bidea, Untzabetxi.
- Maiatzak 11: Arenalde, J. Pablo Ulibarri.
- Maiatzak 18: Villachica, Goikoetxea, Unzalde.
- Maiatzak 25: Basoaldu bidea, Jandiola.