Astelehenean 18:30ean elkartuko dira Kultura Etxean Okondoko ondarea berreskuratzeko ekimenaren inguruan hitz egiteko. Iñaki Garcia Uribe etnografoa izango da gidaria. Izan ere, zaldikoa eta kirikino-hesia berreskuratzea nahi dute.
Hala adierazi du Naiara Otaola zinegotziak: "Obra berehala hasiko da. Bilera, jendeari nola egingo den azaltzeko da, eta parte hartzera animatzeko, politena jende askoren eta anitzen artean egitea baita".
Otaolak aurreratu duenez, eraikiko dutena izango da Okondoko kirikino-hesi bakarra, "eta hori egiten lehenengo herria gara, hori esan digu Iñaki Garcia adituak". Izan ere, kirikino-hesi ugari daude udalerrian, baina ez herrigunean. "Leku publiko batean kirikiñausia egiten den lehenbiziko herria izango da Okondon. Nagusiki, ezkutatuta eta mendian daude kirikiñausiak eta. Horregatik, auzolanean obra hau bultzatzen duen lehen herria izango gara estatuan", azpimarratu du EH Bilduko zinegotziak. Garaikoetxea parkearen alboan egongo da kokatua.
Bestalde, zaldikoa ere eraikiko dute udalerrian, haurreskolako parkearen alboan. Tresna hori abereak ferratzeko baliatzen zen lehen.