Joan den igandean, azaroaren 6an, jokatu zituzten Lau eta Erdiko Master Laboral Kutxa Txapelketako final zortzirenetako kanporaketa partidak. Norgehiagokak Okondon eta Usansolon jokatu zituzten eta Nora Mendizabal eta Leire Garai gailendu ziren, hurrenez hurren.
Okondon zazpi partida jokatu zituzten igande arratsaldean. 16:00etan pilota goxuarekin aritu ziren hiru nagusi bikote, 17:00etan pilota mistoarekin bi gazte bikote eta 18:00etan eliteko jokalariak zelairatu ziren. Elite mailan Nora Mendizabal Ezeiza andoaindarra eta Leire Galeano Mondragon antzuolarra lehiatu ziren. 22-12 irabazi zuen Mendizabalek eta final laurdenetarako txartela eskuratu zuen horrela.
Usansolon, aldiz, Leire Garai gasteiztarra eta Olatz Beitia lekeitiarra aritu ziren pilota mistoko elite mailan. Arabarrak lortu zuen hurrengo kanporaketara igarotzea, 22-5 gailenduta.
Guztira, 65 emakumek hartuko dute parte Lau eta Erdiko Master Txapelketan. Horietatik 28 pilota mistoarekin lehiatuko dira eta gainerakoak pilota goxoarekin. Iragan urriaren 29an eta 30ean egin zituzten aurrekanporaketak Legution eta Atxondon, eta Usansoloko eta Okondoko pilotalekuetatik igarota, norgehiagokak Gordexola, Berriz, Galdakao eta Abadiño izango ditu geraleku. Finala abenduaren 10ean jokatuko da Zornotzako Zelaieta frontoian.
Argazkiak: Okondoko Udala