Jon Escuza del Campo izango da EAJren alkategaia Okondon datorren maiatzaren 28ko udal hauteskundeetan. Alderdi jeltzalearen afiliazioak hartu du erabakia, prentsa oharrean adierazi dutenez.
Egungo alkateak eskerrak eman dizkie beragan konfiantza berriz jarri dutenei. Escuzak aitortu du amaitzear dagoen legealdia ez dela erraza izan, “COVID-19aren pandemiaren ondorio sozioekonomikoengatik”, baina gaineratu du proiektu asko egin direla “okondoarren ongizatea hobetzeko”.
Udala modernizatzeko eginiko lanak azpimarratu ditu gobernuburuak batez ere. “Horren adibide dira herriak sortzen duen informazio guztia partekatzeko jarritako informazio-pantailak edo Whatsappeko kanal berria, bai eta herritarren premiak lehen pertsonan ezagutzen laguntzen duten auzo-batzarrak ere”, goraipatu dute jeltzaleek. Beste hainbat ekimen ere zerrendatu dituzte: ingurumena errespetatzeko eginiko jarduerak, eskola zaharreko obrak, Garaikoetxeako jolas-parkea, San Bartolome plazako sarbideak egokitzeko eginiko esku hartzeak, Ugalde bidea konpontzeko lanak eta auzoak eta kaleen asfaltatzea, besteak beste.
Etorkizunera begira ere jarri da Escuza, datozen hilbateetan Udalak garatuko dituen proiektuak aurreratuta. Kiroldegiko instalazioak hobetzea, eskolako ur eta beroketa sistema aldatzea, Kultur Etxeko estalkia ordezkatzea eta udal igerilekuak berritzea aurreikusi dute, besteak beste. Igerilekuetako tabernari dagokionez, zerbitzua handitzeko asmoa adierazi du alkateak, “sukalde hornitua eta menuak eskaini ahal izateko mahaiak” jarrita. “Horiek guztiak dira agintaldi honetan gauzatu diren proiektuetako batzuk, eta maiatzetik aurrera, okondoarren babes eta konfiantzarekin, garatzen jarraituko ditugunak”.