Lehenik eta behin, zorionak!
Eskerrik asko!
Nola jaso dituzue emaitzak?
Ondo, lasai. Nire kideei eta hemen daudenei esan diedan bezala, azkenean lau urte hauetan egindako lanaren emaitzak dira hauek. Lau urtero jartzen diguten amaierako azterketa da hau, eta hor ikusten da dena.
Emaitza hauek eskuan, zer balorazio egiten duzu?
Ni aurreko emaitzak hobetzearekin konformatzen nintzen, hobetu dira eta nahiko ondo, eta orain dagokiguna da jendeari erakustea hau ez dela amaitu. Indar berarekin jarraituko dugu, lan egiteko modu berarekin, konpromiso berdinarekin eta seriotasun berarekin. Bozketak diren azken azterketa honetan gugan jarri duten konfiantza horri erantzuna emango diogu.
Aurreko udal hauteskundeekin alderatuta, zinegotzi bat gehiago eskuratu duzue, EH Bilduren kaltetan. Nolakoa izango da udal gobernua datozen lau urteetan?
Oraindik emaitzak digeritzen ari gara. Guk eskuratu ditugun emaitzekin pozik gaude. Dena aztertu behar dugu hotzean. Datozen egunetan elkartuko gara eta garaipenaren euforia alde batera utzita aztertuko ditugu datuak. Ikusiko dugu zelan doan.
Amaitu baino lehen, zer mezu bidali nahi diezu okondarrei?
Gugan jarri duten konfiantza eskertzen diegu. Duela lau urte ere jarri zuten konfiantza hori eta gaur are pertsona gehiagok egin dute. Horrek esan nahi du ondo egin dugula lana. Eta gutxi gehiago, udalerriaren alde jarraituko dugu lanean, konpromiso berarekin, seriotasunarekin eta gardentasunarekin. Eta herrian nagoela jendeak behar duenerako. Gertuko pertsona naiz, Okondokoa betidanik eta behar dutenerako kalean aurkituko naute eta ez dezatela inolako zalantzarik izan edozertarako. Azkenean, guztion artean egiten dugu herria.