Aurtengo Arabako Korterraza jaialdiak herrialdeko udalerri gehienak zeharkatuko ditu ekainaren 24tik irailaren 9ra bitartean. Guztira, 49 proiekzio egingo dituzte 42 herritan. Okondon, gainera, bi aldiz egongo da. Ekainaren 30ean bisitatu zuen herria lehen aldiz, Korterraza Txiki saioarekin. Gaur iluntzean berriz bueltatuko da baina, oraingoan, komedia saioarekin.
Korterraza Araba 2023ko programan Arabako udalerriek lau sekzioren artean aukeratu ahal izan dute: Korterraza Super Aukeraketa, Korterraza Komedia, Korterraza Txiki eta Korterraza Mix. Programaren barruan hainbat generoetako film laburrak proiektatzen dituzte aire zabalean.
Programa Aiaraldean hasi eta bukatuko da. Izan ere, Artziniegan estreinatu zen eta Amurrion amaituko da. Ekainaren 24an Korterraza Mix aukeraketa eraman zuten Artziniegara. Okondotik bi aldiz igaroko da eta Lantenon ere egingo du geldialdia: uztailaren 25ean, hain zuzen, Korterraza Komediarekin. Zita 22:00etan jarri dute eskola zaharretako jolastokian. Programaren azken geralekua Amurrio izango da, irailaren 9an haurrei zuzendutako Korterraza Txiki aukeraketa eramango baitute bertara.
Gaur, Okondon
Gaurko hitzordua 22:00etan jarri dute Okondoko udal igerilekuetan. Iragarri dute euria eginez gero emanaldia pilotalekura eramango dutela. Bost eta hogei minutu arteko iraupena duten zazpi film proiektatuko dituzte, adin eta gustu anitzetarakoak, baina barrea eragitekoak betiere.
Hauek dira Korterraza Komedia zikloaren barruan emango dituzten filmak:
- Gas woman (5’, publiko guztientzako)
- Tu tijera en mi oreja (12’, 7 urte)
- Psicópatas de clase media (20’, 7 urte)
- El parto (10’, 7 urte)
- Fiona (8’, publiko guztientzako)
- Plastic Killer (20’, 12 urte)
- Los gemelos (10’, 7 urte)