Okondoko EH Bilduk prentsa oharra zabaldu du jakinarazteko udal aurrekontuen kontra bozkatu zuela otsailaren 9ko udalbatzan. Aurrekontuek, edonola ere, aurrera egin zuten EAJren babesarekin eta Okondo Aurrera taldearen abstentzioarekin.
Koalizioak erabateko desadostasuna adierazi du hiru arrazoirengatik: landu den prozeduragatik, ekarpenak egiteko tarte eskasagatik eta zenbait edukirengatik.
Lanketari dagokionez, EH Bilduk honakoa azaldu du: "Udal Gobernuak astebeteko tartea eman zuen horiek lantzeko eta proposamen propioak gehitzeko. Astebete geroago, otsailaren 2an, dagokion batzordera eraman ziren eztabaidara. Ordubetekoa izan zen batzordea: ordu erdi erabili zen aurrekontuak azaltzeko, eta beste ordu erdia gainerako talde politikoek gure proposamenen zertzeladak emateko, horietan sakondu ezinik".
Gauzak horrela, EAJk ez ohiko osoko bilkura deitu zuen aurrekontuak onartzeko: "Gure proposamenetako bat bakarrik gehitu ahal izan dugu, eta ez dugu inolako partidarik gehitu bizi dugun larrialdi klimatikorako. Gure proposamenetako bat da komunitate energetikoak bultzatzea edo teilatu publikoetan plaka fotovoltaikoak jartzea".
Euskaran eta Berdintasunean talka
Aipatutakoaz gain, EH Bilduk beste bi erabaki kritikatu ditu aurrekontuen edukietan. Alde batetik, euskara sustatzera bideratutako partida 2.500 eurotan murriztu izana deitoratu du: "zenbateko hori kultura arlora bideratu dela esan dute, baina bi partida horiek batuz gero, batura aurreko urteko aurrekontukoa baino txikiagoa da. Gure ustez, bi partida horiek ez lirateke nahastu behar, diru gehiago bideratu beharko litzateke euskara beken bidez edo euskarazko ekitaldi esklusiboen bidez sustatzeko.
Egoera hori bera errepikatu da berdintasunaren arloan: "Era berean, berdintasunera bideratutako partida bateratu dute, airean dagoen proiektu bat sortzeko, berdintasunarekin zerikusirik ez duena. Horrela, ez da inolako partidarik utzi herritarren berdintasunaren arloko prestakuntzarako".