Asteleheneko San Sebastian eguneko ospakizunari segida eman zioten atzo Okondoko Otaola auzoan. Dozenaka lagun bildu ziren goizean goizetik baselizaren inguruan erromeriaz gozatzeko. Eguraldi makurrak ez zuen okondoarren festa gogoa galarazi, eta urteroko tradizioei eutsi zieten.
Ohikoan bezala eukalipto bat moztu zuten baselizako erromeria amaitzerakoan. Moztutako zuhaitza arrastaka eraman zuten herrigunera eta tabernaz taberna adaxkak banatu zituzten.
San Sebastian jaia ospatu zuten larunbatean Okondoko Otaola auzoan. Ekaitzak eta kazkabarrak ez zuen festa giroa zapuztu.
— Aiaraldea.eus (@aiaraldea) January 26, 2025
Kaitin Allende okondoarrak tradizioaren nondik norakoak azaldu dizkigu
Informazio gehiago https://t.co/AW7QKfgMhr atarian pic.twitter.com/MPgrD57AAq
Pintaketak ermitan
Larunbateko ospakizunaren bezperan EAJren Udal Gobernuaren aurkako pintaketa egin zuten Otaola auzoko baselizaren fatxadan. Alderdi jeltzaleak ekintza gogor kritikatu, eta "gaitzespenik irmoena" erakutsi du. Plazaratutako oharrean horrelako ekintzek udalerriko "bizikidetza oztopatzea eta degradatzea" helburu dutela salatu du Okondoko EAJk. Horrenbestez, herriko ondareari egindako kalte materiala ere salatu dute jeltzaleek.
"Tamalgarria da batzeko eta ospatzeko lekuak eta uneak erabiltzea mezu iraingarriak eta akusatzaileak igortzeko, inolako irizpiderik gabe eta herritar guztien ondarea eta sentimendua errespetatu gabe. Ekintza horiek zatiketa eragiteaz gain, gastu erantsia dakarkie udal-kutxei, eta zaildu egiten dute baliabide publikoak behar bezala kudeatzea, guztion onerako", jaso dute zabaldutako oharrean. Era berean, "Okondoko ongizatearen alde zintzotasunez eta konpromisoz lan egiten jarraitzeko asmoa" adierazi du Udal Gobernuak.
Argazkiak: Aimar Gutierrez Bidarte