Okondoko EH Bilduk aldarrikatu du bere ekimenari esker Udal Arau Subsidiarioak aldatuko dituztela, baserrietan etxebizitza bakarra baino gehiago ezartzeko.
Horretarako, koalizioak mozioa aurkeztu zuen apirileko udalbatzan eta, azkenean, EAJk eramandako testua onartu dute.
EH Bilduk azpimarratu du neurriak bi helburu dituela. Alde batetik, udalerrian etxebizitza eskuratzeko aukerak handitu nahi dituzte, eraikinetan elkarbizitzarako unitateak biderkatuta.
Bestetik, herriko baserriak mantentzea dute xede. "Okondoko baserriak, gure ondarea, hondatzen eta behera etortzen ari direla ikusten dugu, eta ezin dugu hori onartu", adierazi du Joseba Ruiz EH Bilduko bozeramaileak.
Horrez gain, koalizioak eskatu dio udal gobernu taldeari babestutako baserrien katalogoa osatzeko, ahalbidetzeko etxebizitza bat baino gehiago hartzea.
Azkenik, Foru Aldundiari exijitu diote "programak abian jar ditzala lurraldeko toki erakundeek etxebizitzak erosi eta birgaitzeko, alokairu sozialerako eta/edo gazteentzako etxebizitzak egiteko". EH Bilduk gogoratu du Foru Gobernuak 2025eko Arabako aurrekontuetarako lortutako akordioan jasota dagoela programa horiek abiatzeko konpromisoa.