Ander Urquiza gazte okondoarrak sendo jarraitzen du bere ibilbidea tenisean. Abuztuan bi garaikur berri gehitu dizkio bere palmaresari eta jadanik 393. kokatu da Espainiako Estatuko rankingean. Bere inguruak oso positiboki baloratu du sailkapena, 16 urte dituela eta lehenengoa Carlos Alcaraz dela aintzat hartuta.
Valentziako Diputazioko Young Tennis Tourreko zirkuituko txapelketa izan da bereganatu duen lehena, abuztu hasieran. Horretarako Jerónimo Padro Londoño kolonbiarra menderatu behar izan zuen final luze eta gogor bat jokatuta. Partidak bi ordu eta erdi iraun zuen eta Super Tie Breaken 10-8 irabazi zuen aiaraldearrak.
Abuztuaren erdialdean Alacanten izan zen berriro lehena Urquiza. Pegoko tennis klubak antolatutako lehiaketan Daniel Denislavov Davernyashk bulgariarrari irabazi zion 2-6, 6-3 eta 10-0. Finala ordu eta erdi baino gehiagoz luzatu zen.
Irabazi ez, baina eskarmentu aparta
Edonola ere, kirolean dena ez da irabaztea eta, maiz, galduta ikasten da gehiago. Hori gertatu zitzaion Urquizari Valentzian lehiatutako Champions Bowl Cup Zirkuitu Nazionalaren Masterraren 16 azpiko kategorian.
Gaztea finala jokatzera heldu zen Tenis Centerren instalazioetan, baina Pedro Montero ezin izan zuen gainditu azken norgehiagokan. Hori bai, jokalari horrek 108. postua dauka ranking espainiarrean.
Zilarrezko dominarekin batera, lorpena izugarriak izan zituen Urquizak, eta finalaurrekoetan Jordi Climent kanporatu zuen. Valentziar hori 118. dago rankingean.