Okondoko bi gazte hil dira gauean herrian gertatutako auto istripuan, eta Udalak hiru eguneko dolua ezarriko du

Aitor Aspuru Saez 2025eko irailaren 2a
Deskargatu Info Ahotsak :

Ertzaintzak oharra argitaratu du istripuaren berri emateko. / Aiaraldea.eus

Gainera, beste gazte batek zauri larriak ditu eta beste bat ere artatu behar izan dute, guztiak Okondokoak. Udalak ezohiko udalbatza deitu du hiru eguneko dolua ezartzeko.

Ertzaintzak jakinarazi duenez, gaur gauean istripua jazo da Okondon, 01:00ak aldera, A-3632 errepidean. Auto bat bidetik atera eta irauli da. Barruan bi gizonezko eta bi emakumezko gazte bidaiatzen ari ziren.

Bi gizonezkoek zauri larrienak jaso dituzte eta suhiltzaileek ibilgailutik atera dituztenean erreanimazioa egin behar izan diete. Hala ere, horietako bat, gidaria, hil da. Beste gizonezkoa gaur goizean zendu da.

Beste bi gazteak, 17 eta 19  urte bitartekoak, ospitaleratu behar izan dituzte eta bat, gainera, egoera larrian dago. Ezbeharraren ondorioz 05:30ak arte eten dute trafikoa errepidean.

Hiru eguneko dolua

Okondoko Udalak hiru eguneko dolua ezartzeko ezohiko udalbatza egingo du gaur 15:00etan. Gertakari larriak jazotzen direnean hartzen du neurria. 

Jendartea Okondo

LAGUN AGURGARRIA:

Bisitatzen ari zaren webgune hau euskararen normalizazioaren alde Aiaraldea Ekintzen Faktoria proiektu berrituak garatzen duen tresnetako bat da.

Euskarazko hedabideak sortu eta eskualdean zabaltzeko gogor lan egiten dugu egunero-egunero langile zein boluntario talde handi batek.

Hedabide herritarra da gurea, eskualdeko herritarren ekarpen ekonomikoari esker bizi dena, jasotzen ditugun diru-laguntzak eta publizitatea ez baitira nahikoa proiektuak aurrera egin dezan.

Herritarra, anitza eta independentea den kazetaritza egiten dugu, eta egiten jarraitu nahi dugu. Baina horretarako, zure ekarpena ere ezinbestekoa zaigu. Hori dela eta, gure edukien hartzaile zaren horri eskatu nahi dizugu Aiaraldea Ekintzen Faktoriako bazkide egiteko, zure sustengua emateko, lanean jarraitu ahal izateko.

Bazkideek onura eta abantaila ugari dituzte gainera, beheko botoian klik eginda topatuko duzu informazio hori guztia.

Faktoria izan, egin zaitez bazkide.

Aiaraldea Hedabideko lantaldea.


Izan bazkide