Larunbat arratsaldea txirrindularitzaren munduan murgilduta emateko aukera egongo da Okondon. Hain zuzen ere, Arabako Foru Aldundiak eta Euskadi Fundazioak antolatu dute Okondo Martxan egitaraua, horrela “kirola eta mugikortasun iraunkorra sustatzeko konpromisoa” erakusteko.
Egitaraua honako hau izango da, arratsaldeko lauretan hasita:
- Marea laranja dokumentalaren proiekzioa, euskal txirrindularitzaren historia eta espiritua aztertzen dituena.
- Hitzaldi-solasaldia txirrindulari profesionalekin, kirolaren esperientziak eta balioak partekatzeko.
- Euskaltel-Euskadi taldearen autobusa, barruko bisitetarako irekia.
- Bidoia oparitzea bertaratutako guztiei.
- Parte hartzea sustatzeko bizikleta materialaren zozketa.
Jarduera guztiak doakoak eta sarrera librekoak dira; beraz, ez dago aldez aurretik izena eman beharrik.
Burgelun azaroaren 2an izan zen hitzordua eta Navaridasen igandean izango da, egitarau bertsuarekin.
Jardunaldien helburua bizikletaren garrantzia azpimarratzea da, “ohitura osasungarriak, lurralde-kohesioa eta jasangarritasuna sustatzeko tresna gisa”, antolatzaileek adierazi bezala. "Herritarrek Araba bi gurpilen gainean deskubritzea nahi dugu, giro familiar eta parte-hartzailean", azaldu du Laura Perez Borinaga Lurralde Oreka eta Lurralde Antolamenduko diputatuak.