Eskualdeko euskararen hiriburu bilakatu zen Okondo igandean. Aiaraldeko Euskalgintza Kontseiluak, herriko euskaltzaleekin elkarlanean, Aiaraldeko Euskararen Eguna antolatu zuen bertan. 2016an Amurrion ekin zioten Aiaraldeko Euskararen Eguna ospatzeari, eta gainerako udalerri guztiak bisitatu ostean, Okondon egin du ekimenak zikloa ixteko azken geralekua.
Euskara pizteko deia
Giro euritsu eta hotzaren aurrean, aterpe epela aurkitu zuten Okondoko pilotalekuan bertan elkartutako dozenaka eta dozenaka herritarrek. Haurrentzako jolasak, Aimara antzerki taldearen emanaldia, Kaitin Allenderen bakarrizketa, herri bazkaria, dantza-plaza... Makina bat ekintza antolatu zituzten "euskara pizteko" helburuarekin. Hain zuzen ere, Aiaraldeko ikastetxeetako ikasleek egindako bonbillek hizkuntzaren aldeko mezuekin bete zuten Okondoko pilotalekua.
Aiaraldeko Euskalgintza Kontseiluak azken hamarkadan egindako bidea jarri zuen balioan, eta euskararen aurkako oldarraldi judizial eta politikoaren aurrean "herritarrak aktibatzeko" beharra azpimarratu zuen. Halaber, erakundeen inplikazioa ere galdegin zuen euskalgintzako eragileak, "behar ekonomikoak" gainditu ahal izateko.
Argazkiak: Aimar Gutierrez Bidarte