Nahikari Nuñez influencer okondoarrak Instagram plataforma erabili zuen atzo bideo bat plazaratzeko zeinean salatu duen Ledesma kalean kokatutako Bilbao Berri tabernatik bota zutela bere bikotea, Sambou Diaby antzezlea. Antza, zerbitzari batek esan zion ezin zuela han saldu eta kanpora joan behar zela.
Nuñezek aipatu zuen agian damutuko zela eduki hori argitaratzeaz, baina azpimarratu nahi izan zuen aurreiritzi arrazistak eta klasistak jasan zituela Sambou Diabyk. Alde batetik, bere azalaren koloreagatik ondorioztatu zuelako zerbitzariak zein zen Diabyren ogibidea eta, bestetik, ustezko lan horregatik ezin zuelako tabernan egon. "Zer gertatzen da, mantero batek ezin duela kafea hartu tabernan?", galdetu zion bere buruari okondoarrak.
Eduki sortzaileak azaldu zuen erreklamazio orria betetzen saiatu zela, baina establezimenduak ez ziola eman. Edonola ere, erantsi zuen arduradunak barkamena eskatu ziola, eta argitu ziola akatsa izan zela. Okondoarraren ustez, arrazismoa eta klasismoa ezin dira horrela definitu: "Akatsa da ardo zuria jartzea ardo beltzaren ordez".
Sambou Diabyk ere hitza hartu zuen bideoan eta aldarrikatu zuen lan handia egiten duela ikusarazteko arraza anitzeko euskaldunak bizi direla Euskal Herrian.