Azken lau urteetan Okondoko San Roman eta San Bartolome festetan euskarak izan duen presentzia aztertu du Aiaraldeko Euskalgintza Kontseiluak (AIEKE), eta txosten batean bildu du ondorioztatutakoa. Egoera kezkagarria da euskararen aldeko eragilearentzat, "euskara bazterrean" baitago.
Amurrioko Udala eta Arakaldokoaren antzera, Okondoko tokiko erakundeak ez du parte hartzen AIEKEk bultzatutako Gora Aiaraldeko Jai Euskaldunak! ekimenean, eta hortaz, herritarrek egin dituzte hainbat ekintza, hala nola kanpainako kartel eta pegatinak herrian banatzea edo eta tabernetan euskara bultzatzeko dinamika aurrera eramatea.
Bide horretan, eta Udalari neurriak eskatzeko helburuz, euskaltzale talde bat Eneritz Alonso alkateordearekin bildu da, eta konpromisoak adostu dituzte, zehazki, hauek:
- Udalak txosnaren esleipenean euskararekin lotutako zenbait irizpide agertuko ditu: paisaia linguistikoa euskaraz ere izatea, euskal musikaren presentzia ziurtatzea…
- Jaietako egitarauan izango diren ekintzetan esatari euskaldunak ziurtatzeko ahalegina egingo da bai udalaren aldetik eta baita euskaltzaleon aldetik.
- Umeen egitaraua osorik euskaraz izango da.
- Helduen egitarauaren zati bat euskaraz izateko ahalegina egingo da, adibidez, euskal musikako talde bat.
- Aiaraldeko Euskalgintza Kontseiluak euskal musika zerrenda bat eskainiko du, bai txosnan eta baita jaietan ere oro har erabiltzeko.
- Tabernetan kanpaina bat egingo da, alde batetik itzulpen zerbitzua eskaintzen karta eta bestelako baliabideak euskaraz izateko eta bestetik, euskarazko musika eskuragarri jartzeko. Udalak aurretik tabernak informatuko ditu eta kanpaina gauzatzen Aiaraldeko Euskalgintza Kontseilua arituko da.
Berbalagun eta Gurasolagun
Euskaltzale taldeak eta Okondoko Udalak hartutako konpromisoak ez dira bakarrik jaietara mugatzen. Izan ere, ikasturtean Berbalagun eta Gurasolagun taldeak indartzeko beharra mahairatu zuten herritarrek eta haurrentzat programatzen den guztia euskara hutsez izatea ere eskatu zuten.
Horrez gain, herriko saltokietan euskara bultzatzeko neurri batzuk ere aztertuko dituzte etorkizunean.
Positiboki baloratu du AIEKEk elkarlanerako bidea, baina Udalari, "euskararen normalizazio eta biziberritzean pauso gehiago ematea" eskatu dio.