Duela hilabete gutxi Masa enpresa zena inauguratu zuten atzo izen berriarekin: Teraplast. Izan ere, konpainia errumaniar horrek erosi zuen lantegia duela hilabete gutxi 6,7 milioi euroren truke eta atzo lau milioi euroko inbertsioa iragarri zuen bere presidente Dorel Goiak. Horrekin ekoizpen gaitasuna %60an handitu nahi dute.
Goiak aipatu zuen etekinen tasa hobetu nahi dutela eta Espainiako estatuko, Frantziako estatuko eta Afrikako Iparraldeko merkatuetan zabaldu nahi dutela euren presentzia.
Berez, enpresak polietilenozko hodiak egiten ditu eta 80 langile ditu kontratatuta. Iaz 29,4 milioi euro fakturatu zituen eta Europako hainbat herrialdetan saltzen ditu bere produktuak.
Enpresak polietilenozko hodiak egiten ditu eta 80 langile ditu kontratatuta gaur egun.
Lanpostuak sortu eta zergak ordaindu
Hizlari ugari izan zituen ekitaldiak (zortzi guztira) eta horien artean Alexandru Stanean mintzatu zen, zeinak adierazi zuen ez zirela turistak eta lanpostuak sortzeko eta zergak ordaintzeko heldu direla.
Errumaniako printzesa
Ordezkaritza zabala egon zen inaugurazioan (Jon Escuza alkatea, Sarai Zarate Ekonomia Diputatua eta Andoitz Korta Sailburuordea, esaterako), baina jakin-min gehien sortu zuen presentzia Margarita Errumaniako printzesarena izan zen. Gogoratu beharra dago Europako Ekialdeko herrialde hori errepublika dela, baina koroa itzuliko balitz, bera izango litzatekeela hautagaia. Berez, Radu Duda printzeak hitz egin zuen ekitaldian.