Arabako Foru Aldundiak Ibaguen eta Okondo arteko bidegurutzean errepidea hobetzeko proiektua idazteko lizitazioa abiatu du. 330.616 euroko aurrekontua izango du kontratuak eta 12 hilabeteko epean egin beharko da.
Berez, 2016-2027 aldirako Arabako Errepideen Plan Integralean dago jasota errepide hori hamar kilometroko tartean hobetzea. Foru erakundeak zehaztu duenez, jarduketak plataforma
handitu eta trazadura gutxienez 60 km/h-ko proiektu abiadurara egokitu beharko lituzke. Izan ere, Itzalde ibaiaren ibilguarekiko paraleloan doa bidea, eta tarte batzuetan bihurgune itxiak eta sestra aldaketaren bat ditu, bai eta bazterbiderik gabeko 6 metro baino gutxiagoko zabalerako galtzada estua er.
Horrez gain, Arespalditzarekin lotzen den A-3624 errepidearekiko bidegurutzea eta Laudiorekin lotzen den A-3632 errepidearekiko bidegurutzea hobetzea eta segurtasun neurrietara egokitzea jasoko du proiektuak.
Okondoko eta Aiarako zeharbideak ere hartuko ditu barne egitasmoak, eta horietan abiadura moteltzeko neurriak aztertuko dira. Izan ere, azken hilabete eta urteetan soka luzea ekarri du errepide horren egoerak, hainbat ezbehar gertatu baitira bertan. Ekainean, esaterako, Etxaurren Ikastolara zihoan autobusak istripua izan zuen.
Arabako Foru Aldundiak adierazi duenez "esku hartze integral horren bidez, bide segurtasuna, funtzionaltasuna eta azpiegituraren gaitasuna hobetu nahi dira, indarrean dagoen araudira egokitzen dela bermatuz eta konponbideak optimizatuz ikuspuntu tekniko, ekonomiko eta ingurumenekotik".
Jon Nogales Mugikortasun Jasangarriaren eta Bide Azpiegituren Saileko foru diputatua ekainean bildu zen Okondoko eta Aiarako alkateekin eta konpromisoa hartu zuen uda honetan proiektuaren idazketa lizitatzeko, obren lehenengo fasea 2027ko amaieran lizitatzeko helburuz.