AGUR (Orozko, 1999) grafitigilea da. 12 urterekin hasi zen irudi eta hizkiekin arte lanak sortzen.
Noiz eta nola hasi zinen graffitiak egiten?
Duela bost edo sei urte hasi nintzen, klasean. Lagunekin ere egiten ditut, grafitiaren munduan gaude.
Zer da zuretzat grafitia?
Zaletasun bat da, hobbya. Batzuk kirola egiten duten bezala, nik grafitiak margotzen ditut. Mezuaren arabera grafitia aldarrikapena edo artelana izan daiteke.
Letrak ala marrazkiek, zerk ezaugarritzen dute “Agur”?
Betidanik marrazkiak egin ditut, baina orain errazena, politena eta dibertigarriena letrak iruditzen zaizkit, mezua bidaltzea.
Ezizenak bereizten zaituzte. Zergatik zara zu “Agur”?
Askotan esaten nuen hitza zela konturatu nintzen. Horregatik aukeratu nuen.
Non ikus litezke zure lanak?
Laudion, Orozkon... Aiaraldean batez ere, baina Bilbon ere baditut lan batzuk.
Nola ikusten duzu Aiaraldeko grafitigintzaren egoera?
Nahiko ondo. Grafiti egile asko daude, eta maila handia dago. Mugimendu asko dago. Urduñako tren linean mural asko daude. Trenbideak, industrialdeak, errepideak... margo daitezkeen leku asko daude. Ugaon edo Gardean, esaterako, irudi asko daude. Guk talde bat daukagu, MRT, gehienak Orozkokoak gara baina bada beste herri batzuetako jendea ere.
Eskualdeko sortzaileen artean harreman ona dago, beraz.
Bai, beste talde batzuk ere badira. Harreman gutxi daukagu, baina ona. Gehienak ezagutzen gara.
Zer falta zaio grafitigintzari?
Herrietan mural libreak egiteko tokiak, nahi duzunean marraztu ahal izateko.
"Grafitiek bizitza ematen diete herriko paretei. Gainera, herri erdian badago, edo jende asko pasatzen den tokian, ikusteko polita izateaz gain baloreak transmititzeko balio dezake"
Zure lanetatik bat aukeratu beharko zenuke, zein izango litzake?
Momentu honetan Berganzan egin genuena. Bizikletak hartuta gauez joan ginen, momentu polita izan zen. Errepide alboko nire lehen grafitia izan zen.
Graffitiak egitea arriskutsua al da?
Lekuaren arabera, normalean jendeak ikusi egiten zaitu, beraz, ez dago arriskurik, ez zaio inporta, ez dute ezer esaten.
Zeintzuk dira grafitigilearen legeak?
Errespetua. Grafitiak egiten dituen pertsona baten lana zapaltzea edo marratzea ere oso gaizki dago.
Edo, kopiatzea.
Artista bezala zein da zure ametsa?
Dirua banu munduan zehar bidaiatu eta paretak margotzea.