ELIXABET SAIZ ROJOk (Orozko, 1991) sei urte daramatza Garrafa Lehiaketan parte hartzen. Lehiaketaren nondik norakoen inguruan mintzatu da. Bihar egingo dute garrafa lehiaketa 11:00etatik aurrera.
Noiztik daramazu Garrafa Lehiaketan parte hartzen?
Duela sei urte hasi nintzen parte hartzen, gutxi gora behera. Nire aita Garrafa Elkartean zegoen, eta berarekin hasi nintzen. Asko gustatzen zait lehiaketan parte hartzea, giroa oso ona delako. Norbaiti zer edo zer ahazten bazaio gainontzeko parte hartzaileek uzten diote. Lehiakortasuna dago, baina sanoa.
Orduan hasi zinen garrafa egiten edo lehenagotik datorkizun zaletasuna da?
Behin lehiaketara gerturatu nintzen, ikustera. Asko gustatu zitzaidan garrafa egitearen kontua. Duela sei urte nire aitak Niko Astobitzari galdetu zion ea nola lortu zezakeen garrafa bat.
"Estatu Batuetatik ekarri genuen gure garrafa. Badaude baita Euskadin eginikoak, baina guk etxean ditugunak kanpotik ekarritakoak dira"
Eta sei urte hauetan saririk lortu al duzue lehiaketan?
Oraindik ez (barreak). Baina nire esperantza da aurten sariren bat edo eramatea. Urtero goaz lehiaketara pentsatzen sariren bat jasoko dugula, baina momentuz ez da inoiz gertatu.
Maila altua dago lehiaketan?
Bai. 50-60 garrafa inguru aurkezten dira, eta maila oso altua izaten da.
Sekreturik al dago garrafa on bat egiteko?
Epaileek ebazten dute garrafa onena zein den. Baina nire ustez osatuena dagoena da garrafa onena. Hau da, txakolin edo brandy gehiegi ez duena. Osagai guztien arteko oreka bilatzean datza garrafa on bat egiteko sekretua. Hala ere, bakoitzak bere gustuen arabera egiten du, guk orekatua egiten dugu.
Entrenatuta zoazte lehiaketara?
Ez, gu bertara joaten gara eta bertan egiten dugu garrafa, aurretik probarik egin gabe.
Eta jende guztiak egiten du horrela?
"Nabaritzen da batzuk esperientzia handia dutela, garrafekin urte asko daramatzatelako. Baina gehienek ez dute aurretiazko entrenamendurik egiten"
Batzuek agian familiarekin bazkariren bat baldin badute animatzen dira garrafa egitera, baina gu lehiaketarako erreserbatzen gara.
Lehiaketa egunean baino ez duzue garrafa egiten?
Ez, familia bazkariren batean animatu izan gara baita egitera. Ez gara txapelketara mugatzen. Okasio berezietan ere prestatzen dugu.
Zure adineko jendea animatu egiten da garrafa egitera?
"Gure adineko jendea ere animatzen da Garrafa Lehiaketan parte hartzera, ez soilik jende nagusia"
Ikusten da jende gaztea. Lehiaketan ikusten dira gurasoak 9-10 urteko seme-alabekin. Belaunaldiz belaunaldi mantentzen doa tradizioa.