Bizkaiko Foru Aldundiak katastroa eguneratu du eta horrek eragina izango du Ondasun Higiezin Zergan Orozkon. Izan ere, aldundiak duela 40 urte ez zuela katastroa aztertzen eta, berez, higiezinen balioa 7 bider igo da.
Hala ere, Orozkoko Udalak azaldu du herritarrek ez dutela 7 bider gehiago ordainduko, %6a baizik. Josu San Pedro alkateak argitu du herriko batzuek gehiago ordainduko dutela eta beste batzuek gutxiago, zenbait higiezinen balioa eguneratuta baitago.
Dena den, erakundeak ez daki zehazki zein izango den eragina osotasunean. Jabe askok zuzenketak aurkeztuko dituzte, eguneraketa ez baita kasu batzuetan guztiz egokia.
%6ko igoera horrekin orain arteko diru kopuru bera eskuratzea esperi dute.
Printzipioz, udalaren asmoa ez da diru gehiago jasotzea, baina horrela izango balitz, familia handien mesederako bideratuko dituzte bitarteko horiek.
Hobariak merkatari txikientzat eta lehen sektoreari, besteak beste
Hobarien bitartez herriko zenbait sektore lagundu nahi ditu udalak:
- Merkatari txikiek %20ko hobaria izango dute eta hori orekatzeko industria handiari zerga igoko zaio.
- Legez lehen sektoreari lotutako higiezinek %90ko hobariak lortuko dituzte.
- Eguzkiko energia erabiltzeko sistemak ezarri dituztenek eta bere energiaren %40 hortik sortzen dutenek %50eko hobaria jasoko dute.
- Administrazioak sustatutako alokairu zerbitzutan dauden etxebizitzek %50eko hobaria egokituko zaie.
Herriguneko etxebizitza hutsek %50eko errekargua ordainduko dute
Zentzu berean, gainordaina ezarri die udalak herrigunean dauden etxebizitza hutsei. Errekargutik kanpo egongo dira landa-eremuko baserriak, alokairu programa publikoetan parte hartzeko aukerarik ez baitute.
Bestalde, 6 eurora heltzen ez diren fakturak ez dituzte kobratuko udalean.