Bihar Santa Luzia azoka egingo dute Orozkon eta ohitura bilakatu den Euskadiko Terreña Arrazako Txapelketa ere gauzatuko dute.
10:00etan abiatuko dute ekimena eta ordu horretan tokiko ekoizleek -26 hain zuzen- euren produktuak izango dituzte ikusgai. Ordu erdi beranduago gauza bera egingo dute abeltzainek.
Horrez gain, artisauak herriko pilotalekuan egongo dira.
Sariak
Tokiko ekoizleen artean hurrengo sariak banatuko dituzte: etxeko ogirik onena, gaztarik onena, erakustokirik onena eta barazkirik onenak.
Abeltzainentzako 12 sari prestatu dituzte. 15 ganadutegi bertaratuko dira Orozkon eta guztira 70 animali erakutsiko dituzte.
Sarien banaketa 13:00etan izango da.
Terreña haragia dastatzeko aukera: 500 hanburgesa
Bihar terreña arrazako hanburgesak dastatzeko eskaintza berezia egingo dute 1,5 euroren truke, eguerditik aurrera. Pintxoa ez ezik txakolina ere emango dute. Antolatzaileek aurreikusi dute 500 hanburgesa salduko dituztela.
Hitzaldia
Gaur, ordea, jardunaldi teknikoak gauzatuko dituzte. Gaia haragiaren kalitatea izango da eta Txema Fernandez -terreña arrazan aditua- eta Jose Antonio Olamendi -Eroskiko haragien saileko arduraduna izandakoa 27 urtez- arituko dira.
Hitzordua 18:00etan izango da Donibane Aretoan.
Aste gastronomikoa
Aurten ere terreña arrazako haragiaren aste gastronomikoa antolatu dute. Abenduaren 7an hasi zen eta 13an amaituko da. Arrugaeta, Batzoki, Eneko, Iza, Otegi eta Txomin tabernek konpromisoa hartu dute eta terreña haragia txertatuko dute menuan.