Sanantolin jaiak 6 egunez luzatuko dira Orozkon eta gaur abiatuko dituzte txupinazoaren bitartez. 19:00etan izango da hitzordua eta Urtzi Vera argazkilariak irakurriko du pregoia.
Ordu berean plazako frontoian hasiko dira esku pilota partidak eta 21:00etan puntako hiru bertsolari arituko dira Zubiaur plazan: Maialen Lujanbio, Unai Iturriaga eta Igor Elortza hain zuzen.
22:00etan musika emanaldia eskainiko dute DJ-ek txosna gunean.
Bihar San Antolin eguna
Biharko egitarauari dagokionez bi ekintza jendetsu eta herrikoi aipatu beharra dago. Alde batetik, Garrafa lehiaketa -11:00etan Zubiaur plazan- eta bestetik Txalupa lasterketa -17:30ean Altube errekan-.
Horretaz gain, urtero legez, Joselu Anayak-en erromeria egongo da.
Umeen txanda asteazkenean
Umeak izango dira protagonistak asteazkenean hainbat ekintza antolatu baitituzte haientzat; umeentzako parkea, ur jokoak, bazkaria, Irrien Lagunen klubeko ikuskizuna, mozorro lehiaketa...
Txosna gunean, aldiz, elkartasun afaria egingo dute Uluka taldearen kontzertuarekin uztartuz.
Ostiralean kalean egoteko hamaika aitzakia
Berakatz egunak parrandarako hainbat aukera emango ditu. Besteak beste, Joko poteoa gauzatuko dute.
15:00etan herri bazkariaren ordua helduko da eta gero musika hitzordu ugari: batukada, The Beatles taldearen omenezko kontzertua eta Las Tea Party Djs, Egurra eta Kitto eta Marianitoz Blai -azken hiru horiek Txosna gunean-.
Betagarri
Larunbatean Betagarri taldeak Gorbeia kalea doinuz beteko du, baina Gasteizko taldea ez ezik beste hainbat egongo dira Orozkon: Pedrá, DJ Markelin, Lyrikan, Patx & Run...
Eta horretaz gain marmitako lehiaketa, pala partidak, herri kirolak, kalejira, mus lehiaketa, antzerkia eta Irrintzi txapelketa ere egingo dute.
Agurra
Jaiarako grin gehiena larunbatean erre ostean igandean oraindik ekintza ugari egingo dituzte. Protagonismo berezia izango dute zezen ikuskizunek; zekorrak plazara atera ondoren solasaldia egingo baitute eta horretaz gain zekorketa. Hala ere ospakizun gehiago egongo dira: jubilatuentzako bazkaria, erromeria...