Hedabideek zabaldu dutenez Euskal Autonomia Erkidegoko Justizia Auzitegi Nagusiak ebatzi berri du EAJ eta Bilduko kontseilariek ez zutela legez kontrako jarrera izan Zubiaur Eraikuntzak sozietatearen kudeaketan. Erabaki horren aurka ez dago helegitea aurkezteko aukerarik beraz auzia bukatutzat eman daiteke.
Ebazpena Bilboko Administrazioarekiko auzien 1º zenbakiko epaitegiak uztailaren 8an eman zuen erabakiaren aurkakoa da. Uztailean epaile batek agindu zuen Zubiaur Eraikuntzak-eko EAJ eta Bilduko ordezkarien jokaera ikertu behar zela "delitu zantzuak" zeudelako. 2012an ordezkari horiek adostu zuten sozietatearen gerentzia-kontratazioa esleipena lehiaketan puntuazio gehien eskuratu zuen enpresari ez ematea.
Helegiteak arrazoia eman dio oposizioan dauden bi talde politikoei. Euskal Autonomia Erkidegoko Justizia Auzitegi Nagusiak ziurtatu du EAJ eta Bilduko ordezkarien asmoa prozedura modu zuzenean jarraitzea zela. Epaileak gaineratu du kontratazio mahaiak ez zuela prozedura jarraitu.
Helegitearen aurkezpena
Irailaren hasieran Zubiaur Eraikuntzak Sozietatearen Ez-Ohiko Batzar Orokorra egin zuten eta eztabaida zakarraren ostean EAJ eta Bilduren bozei esker helegitea aurkeztea adostu zuten, ADIE taldearen iritziaren aurka.
Ondorioz, Zubiaur Eraikuntzak Sozietatean aritu diren EAJ eta Bilduko 3 kontseilariek Zigor Kodearen 262 artikuluan jasotzen den delitua egin duten ikertzeko eskaera bertan behera geratu da (urte bat eta hiru urte bitarteko espetxe-zigorra eta 12 eta 24 hilabete bitarteko inhabilitazioa jasotzen du Zigor Kodeak delitu mota horrentzat).
Balorazio ezberdinak
Orozkoko udalean ordezkaritza duten alderdien balorazioak oso ezberdinak izan dira. EAJko kideek pozik agertu dira hedabidetan ebazpenarekin eta haien ustez frogatu da prozedura jarraituz hartu zituztela erabakiak.
Josu San Pedro alkateak kontrako hausnarketa egin du. Alkateak azpimarratu du aurreko ebazpena bertan behera utzi duela Euskal Autonomia Erkidegoko Justizia Auzitegi Nagusiak bi erakundetan egin zelako salaketa: lehenik eta behin Eusko Jaurlaritzan eta epaitegietan gero.
"Adieri kezkatzeko modukoa iruditzen zaio gertakari larriak artxibatzea akatz administratiboa dela eta. Hemen oso merke ordaintzen da ustelkeria, azken finean nahi dutena egiten dute eta ez da ezer gertatzen" adierazi du alkateak.
EH Bilduk ez du auzia bukatutzat eman. Amaitutzat ematen duenean bere iritzia azalduko duela adierazi du.