Itxinape Mendiko Taldeak XXVI. Iraupen Ibilaldia antolatu du urriaren 5erako. Bi ibilbide egongo dira, bata 25 km-koa, eta beste bat luzeagoa, 38 km-koa.
Domeka honetan Orozko Euskal Herri osoko mendizaleen topaleku izango da Orozko Harana XXVI. Iraupen Mendi Ibilaldiari esker. Ibilaldi hau Euskal Mendizale Federazioaren iraupen luzeko martxen zirkuituaren barruan dago eta udalerriko tontor eta inguru ikusgarrienak zeharkatuko ditu. Zubiaurreko plazatik abiatuko da ibilaldia Kolometa eta Oderiaga ingururantz, eta bi ibilbide edukiko ditu: alde batetik, ibilbide laburra, 25 kilometrokoa, eta bestetik ibilbide luzea, 38koa. Bien arteko aldea da ibilbide luzeak Ipargortatik aurrera joango dela, Egiriñaon barrena Gorbeiaganeko gurutzeraino, hain zuzen ere. Mendi ibilaldiaz gainera, aukera aprobetxatuz, Orozkoko Garrafa Kultur Elkarteak garrafa erakusketa eta dastaketa egingo du Zubiaurreko plazan bertan eguerdiko 12:30etik aurrera.
Izena emateko epea irailaren 17tik dago zabalik eta bihar itxiko da. Web orriaren bidez baino ezin izango da egin, ez egunean bertan, eta banakakoa izan behar du. Federatuek eta Itxinapeko bazkideek 5 euro ordaindu behar dituzte, eta beste guztiek 5 euro.