Orozkoko gobernu taldeak azaldu duenez ez ditu 2014ko udal aurrekontuak aurkeztuko Zubiaur Eraikuntzak sozietatearen kontuen atzerapenagatik. Ondorioz, 2013ko aurrekontuak luzatuko dituzte.
Zubiaur Eraikuntzak sozietatea zenbaki gorrietan
Horren inguruan galdetuta, gobernu taldeak azaldu du aurreko urtearen bukaeran eskatu zituela sozietatearen kontuak baina aurtengo otsailean udaleko aurrekontuaren proposamena aurkeztu eta gero heldu direla eta zenbaki gorrietan daudela.
Josu San Pedro alkateak dioenez, aurrekontu batzuk zenbaki gorrietan aurkezten direnean onbideratze plan batekin lagundu behar dira eta kasu honetan ez dago horrelakorik.
Egun Zubiaur Eraikuntzak sozietatea likidazio prozesuan dago eta ez dauka presidenterik ez inolako kargurik bere egituraren barruan. Hau da, likidatzailearen esku dago dena. Beraz, ezinezkoa litzateke sozietatearen kontu positiboak aurkeztea udaleko aurrekontuak betetzeko. Hori horrela, gobernu taldeak ez dio inolako zentzurik ikusten aurrekontu batzuk aurkezteari 2015ekoak hain gertu daudelarik.