Hurrengo astelehenean bukatuko da Amagoia Elezkanoren hiltzailea epaitzen duen auzia eta asteartean edo asteazkenean bertan adierazi dezake epaimahai herritarrak zein den bere erabakia.
Astelehenean abiatu zen epaiketa. Egun horretan epaimahai herritarra osatu zuten, eta defentsa eta akusazioaren hasierako alegatuen ostean akusatuak deklaratu zuen. Francisco Javier M. N.-k azaldu zuenez, Amagoia Elezkano haserrealdi batean erail zuen, haien arteko harremana bertan behera utzi nahi zuelako Amagoiak.
Asteartean biktimaren auzokide eta lankideek deklaratu zuten eta atzo, aldiz, senide eta ikerketa egin duten ertzainek. Bihar eta etzi auzitegi medikua, psikiatra eta perituek deklaratuko dute.
25 eta 2,5 urteko kartzela zigorra eskaerak
Fiskala eta akusazio popularrak -hau da, udalak- 25 urteko kartzela zigorra eskatu dute hiltzailearentzat. Akusazioaren abokatuak uste du hiltzaileak ankerkeria eta azpijokoz jokatu zuela. Defentsak, ordea, 2,5 urteko zigorra eskatu du. Defentsaren ustez haserrealdi baten ondorioz hil zuen bere bezeroak Amagoia Elezkano.
Josu San Pedro alkatea epaiketan
Orozkoko alkatea astelehenean eta asteazkenean egon da epaiketan: “senideei babesa emateko”. Josu San Pedrok ez du uste hilketa bat-bateko kontua izan zenik eta zalantzan jartzen du akusatuaren bertsioa.
Alkatearen aburuz, azpijokoz eta ankerkeriaz jokatu zuen hiltzaileak. Horretarako atzo deklaratutako ertzainek esandako hainbat kontu aipatu du: hiltzaileak arropa aldatu zuela polizia agertu baino lehen, erabilitako labana garbitu zuela edo aurrezki-libreta apurtu zuela inork lapurtu ez zedin.