NIKO ASTOBITZA (Orozko, 1954) Orozko Garrafa Kultur Elkarteko kidea da. Garrafa lehiaketa antolatuko dute elkarteko kideek jaietan.
Ez zarete Garrafa lehiaketa antolatzen duzuen lehenbizikoak.
Ez. Lehen lehiaketa lagun batzuen artean egin zuten. 2003. urtean izan zen. Gero, 2005ean, Orozko Garrafa Kultur Elkartea sortu genuen, eta ordutik hona elkarteak antolatu du lehiaketa.
Orozkoko museoan erakusketa bat egin genuen, Snow Food batera joan ginen, BECeko Expo Vacaciones batera ere, telebista zein egunkarietan elkarrizketak lotu genituen... oso kanpaina indartsua egin genuen eta horren ondorioz garrafa asko zabaldu da.
Zertan datza sanantolinetan ospatzen den Garrafa Lehiaketa?
Garrafa lehiaketa egiteaz gain, alkoholik gabeko zukuen eta izozkien dastaketa egiten dugu. Parte-hartzaile bakoitzak ura, ardo zuria, brandya, limoia eta azukrea eraman behar ditu, eta baita garrafa ere. Hala, lehiaketa museo bilakatzen da, Frantziatik, Ameriketatik, Alemaniatik.... leku askotatik ekarritako garrafak ikusi daitezkeelako. Iaz 54-56 garrafa inguru aurkeztu ziren.
Tradizio handia dauka garrafak Orozkon...
Guk baditugu dokumentuak zeinetan aipatzen den 1850ean jada bazegoela Orozkon garrafa egiteko ohitura. 1885eko Bizkaiko Historiaren liburu batean honakoa esaten da: “Orozkoko haranekoak maisuak dira limonadak egiten”.
Orozko inguruan dauden elurzuloek ere zerikusia izango dute...
Orozkon Euskal Herriko elurzulorik handienak daude. Bata Neberabarri, eta Neberabaltz bestea. Lehenengoan ateratzen zen izotza Bizkaia guztira iristen zen, baita Bilbora ere. Eta hor negozio oso handia zegoen. 16-17. mendeetako Orozkoko Udalaren aurrekontuaren hiru laurdenak izotzaren gaineko errenten bidez lortzen ziren.