Orozkoko Udalak zuzenean bi pertsona kontratatuko ditu Lanbideren bitartez, Eusko Jaurlaritzak martxan jarri duen programa berri baten laguntzarekin. Lau hilabeterako kontratuak izango dira eta euren zeregina herriko altzarien egokitzapena eta margotzea izango da, baita brigadarekin lan egitea.
Kontratua ekainaren 15ean hasiko da eta langileen aukeraketa Lanbideren esku egongo da. Hau dela eta, Udaletik postua nahi dutenei Lanbiden daukaten curriculuma eguneratzeko gomendatzen die. Lanbideren bulegorik gertuena Laudioko Virgen del Carmen kaleko 15. zenbakian aurkitzen da eta bulegoaren telefonoa hurrengoa da: 94 498 57 30
Hautatuen artean zozketa egingo dute eta kontratuak lanaldi laburrekoak izango dira.
Alternatiba: autoenplegua
Lau orozkoarrek Nerbioi-Ibaizabal herrialdean Bizkaiko Aldundiak martxan jarritako ekonomia berpizteko eta enpresa-bokazioa bultzatzeko programan parte hartu dute. Orozkoko 18 auzotar aurkeztu dira programa horretara eta azkenean lau aukeratu dituzte.
Lau orozkoarrak hiru hilabeteko ikastaro batean daude. 350 euro jasoko dituzte eta prestakuntza horretan enpresa bat aurrera eramateko ezaguerak jasoko dituzte. Azkenean enpresa bat irekitzen dutenek itzuli beharrik gabeko 5.000 euro jasoko dituzte.
Josu San Pedro, Orozkoko Alkateak, ekimen hau oso positibotzat jo du “ekintzaileak laguntzeaz aparte gure herrian aberastasuna eta lanpostu berriak sortuko direlako”.