Gobernu-taldeak Ertzaintzarekin hitz egin du, aurreko ostegunean Gazte Asanbladako kideak Gaztetxera berriz sartu zirelako, zigilatua egon arren
Orozkoko udalak berriz zigilatu du Gaztetxea. Hala jakinarazi dute Orozkoko Gazte Asanbladako kideek. Goizeko bederatzietan bertaratu dira udal-langileak gaztetxearen atea eta sarraila prezintuz ixtera. Aurreko asteko ostegunean zigilatu zuten Gaztetxea lehenbiziko aldiz, baina Gazte Asanbladako kideek prezintua kendu eta berriz sartzea erabaki zuten. Gazte Asanbladak egindakoa Ertzaintzari helarazi diotela adierazi du Josu San Pedro alkateak, poliziak horren harira zer egin erabaki dezan.
Gobernu-taldeak Ertzaintzarekin hitz egin du, aurreko ostegunean Gazte Asanbladako kideak Gaztetxera berriz sartu zirelako, eraikina zigilatua egon arren
Orozkoko udalak berriz zigilatu du Gaztetxea. Hala jakinarazi dute Orozkoko Gazte Asanbladako kideek. Goizeko bederatzietan bertaratu dira udal-langileak gaztetxearen atea eta sarraila prezintuz ixtera. Aurreko asteko ostegunean zigilatu zuten Gaztetxea lehenbiziko aldiz, baina Gazte Asanbladako kideek prezintua kendu eta berriz sartzea erabaki zuten. Gazte Asanbladak egindakoa Ertzaintzari helarazi diotela adierazi du Josu San Pedro alkateak, poliziak horren harira zer egin erabaki dezan.
Gazte Asanbladatik adierazi dute udalaren erabakiak ez duela “ez zilegitasunik eta ezta zentsurik ere”; eta gaineratu dute Gaztetxean jarraitzeko asmoa dutela, Udala baldintza minimo batzuetara moldatu arte. Bere 4. urteurrena ospatuko du Gazte Asanbladak datorren larunbatean, eta Gaztetxean hainbat ekintza egiteko asmoa dauka.
Alkatetza dekretu bera
Aurreko asteko zigilatzeko alkatetza dekretu bera erabili du udal-gobernu taldeak bigarren zigilatzerako. Dekretu horretan Josu San Pedro alkateak adierazi du Gaztetxeak ez duela udal-lizentziarik eta inguruan bizi diren bizilagunek "kexak" aurkeztu dituztela, "Gaztetxean egiten den jarduerak sortzen duen zaratagatik".
Hala, Gaztetxea zigilatzea "prebentzio neurria" dela adierazi du alkateak, eta "aldi baterako ixtea" dela gaineratu du, Gaztetxean egiten den jarduera "legeztatzen eta erregularizatzen den arte".
Hortaz gain, aurreko asteko zigilatzea egin zenean bando bat ere atera zuen gobernu-taldeak, lehenengo zigilatze horren nondik norakoak azaltzeko. Bertan azaltzen denaren arabera, pasa den otsailean agindu zuen udalak Gaztetxea ixtea, “lokala erabiltzen duten gazteek auzokideekin eta udalarekin hartutako konpromisoa errespetatzen ez dutela ikusita”.
Klausura agindu horren ostean, Udaletik “elkarrizketa prozesu bat” abiarazi zutela azaldu zuen bandoan gobernu-taldeak, baina salatu zuen prozesu hori egiten aritu izan ziren bitartean Gazte Asanbladak Gaztetxean ekintzak egiten jarraitu zuela, “klausura aginduari jaramonik egin gabe”. Ekintzak egiteari uzteko eskatu arren Gazte Asanbladak bere jarduerekin jarraitu zuela gaineratu zuen Gobernu taldeak, eta hala arrazoitu zuen zigilatzea.