Pasaden hilabetean, Herri-Kontuen Euskal Epaitegiak Orozkoko Udalari buruzko fiskalizazio txostena argitaratu zuen eta alkatetzan dagoen Adie talde independenteak txostenak jaso dituen hainbat puntu azpimarratu ditu.
Alkate ohiak jasotako dietak
Zubiaur Eraikuntzak Sozietate publikoaren Administrazio Kontseiluak 2007an lehendakariari -hau da, alkatea ohiari- dieta kontzeptuan hilero 1.030 euroren ordainketa egitea erabaki zuen, hau da, 14.424 euro urtero. Datu horren aurrean eta epaitegiak esandakoaren harira, Adiek azpimarratu nahi du ordainketa hauek dietak baziren ondo justifikatu beharko direla. Hala ere, soldata itxura ikusten diote eta soldata bi erakunde publikoetatik aldi berean ezin denez kobratu, “diru publikoarekin jolastea oso grabea dela” nabarmendu dute.
Zentzu horretan, dietak berriro aztertuko dituzte eta gastuak justifikatu gabe egongo balira dirua itzultzeko eskatuko dute.
Hegoaldeko etxebizitzen konkurtsoa
Herri-Kontuen Euskal Epaitegiak ateratako txostenak irregulartasunak sumatzen ditu Hegoaldeko etxebizitzen eraikuntza erabakitzeko konkurtsoan; eta Adiek hori ere nabarmendu nahi izan du. “Izan ere, 80 etxebizitza egiteko konkurtsoa atera zen baina 54 bakarrik egin ziren eta gainera konkurtsoaren barruan sobreak ez ziren epe egokietan zabaldu, informazio gehiegi emanez.”